វាយកូនបាល់៖ កីឡាករវាយកូនបាល់លេខ ៤ ពិភពលោកសញ្ជាតិក្រិក Stefanos Tsitsipas បានចែករំលែកបទពិសោធរបស់ខ្លួនកាលពីកុមារភាព ដល់ក្រុមក្មេងៗអ្នករើសគ្រាប់បាល់ប្រមាណជិត ៤០០នាក់ដែលត្រៀមលក្ខណៈសំរាប់ព្រឹត្តិការណ៍ Grand Slam, Australian Open។
ក្នុងកិច្ចទទួលការស្វាគមន៍របស់ក្រុមក្មេងៗរើសគ្រាប់បាល់នៃការមកដល់របស់ Stefanos Tsitsipas កីឡាករវ័យ ២៣ឆ្នាំរូបនេះនិយាយថា កាលពីមុនគេក៏ធ្លាប់ជាក្មេងរើសគ្រាប់បាល់ដែរ នៅក្នុងក្លិបវាយកូនបាល់មួយនៅប្រទេសកំណើត ដែលនៅពេលនោះមានការប្រកួតកូនបាល់ថ្នាក់ជាតិមួយត្រូវបានរៀបចំនៅទីនោះ ហើយការពិតណាស់ត្បិតជាក្មេងរើសបាល់ម្នាក់ដែលមានអារម្មណ៍រីករាយណាស់ និងមានក្តីស្រមៃចង់ក្លាយជាកីឡាករអាជីពនៅថ្ងៃណាមួយ។
កីឡាករក្រិករូបនេះបានបន្តទៀតថា កាលពីមុនដែលជាក្មេងរើសបាល់នោះមិនស្ទាត់ជំនាញដូចក្មេងៗឥឡូវទេ មិនដូចក្មេងៗបច្ចុប្បន្នដែលទទួលបានការហ្វឹកហាត់ច្បាស់លាស់ និងយកចិត្តទុកដាក់ខ្ពស់ពីអ្នករៀបចំ។ សូមបញ្ជាក់ថា ព្រឹត្តិការណ៍ Grand Slam, Australian Open នឹងចាប់ផ្តើមនៅថ្ងៃទី១៧ ខែមករានេះបញ្ចប់នៅថ្ងៃទី៣០ ខែដដែល។ Stefanos Tsitsipas ធ្លាប់មានស្ថិតិល្អបំផុតនៅ Australian Open នេះដោយឡើងដល់វគ្គពាក់កណ្តាលផ្តាច់ព្រ័ត្រនៅឆ្នាំ២០១៩ និង ២០២១៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
