រដ្ឋមន្ត្រីការបរទេសអ៊ីរ៉ង់ លោក Abbas Araghchi បានបញ្ជាក់ច្បាស់ៗប្រាប់ទូរទស្សន៍ Fox News ថាទីក្រុងតេអេរ៉ង់ មិនអាចបោះបង់ចោលនូវកម្មវិធីចម្រាញ់សារធាតុអ៊ុយរ៉ានីញ៉ូមរបស់ខ្លួនបានឡើយ ដែលត្រូវខូចខាតយ៉ាងធ្ងន់ធ្ងរក្នុងអំឡុងពេលសង្គ្រាមអ៊ីស្រាអែល-អ៊ីរ៉ង់ កាលពីខែមុន។

មុនពេលសង្រ្គាមនោះ អ៊ីរ៉ង់ និងសហរដ្ឋអាមេរិក បានរៀបចំកិច្ចចរចានុយក្លេអ៊ែរ ៥ជុំមកហើយ ដែលសម្របសម្រួលដោយអូម៉ង់ ប៉ុន្តែនៅតែមិនអាចយល់ស្របលើវិសាលភាពចម្រាញ់សារធាតុអ៊ុយរ៉ានីញ៉ូមដ៏គ្រោះថ្នាក់របស់អ៊ីរ៉ង់។ អ៊ីស្រាអែល និងអាមេរិក និយាយថា អ៊ីរ៉ង់ជិតចម្រាញ់អ៊ុយរ៉ានីញ៉ូមដល់កម្រិតផលិតអាវុធនុយក្លេអ៊ែរបានហើយ ខណៈទីក្រុងតេអេរ៉ង់និយាយថាកម្មវិធីនុយក្លេអ៊ែររបស់ខ្លួនគឺសម្រាប់គោលបំណងស៊ីវិលប៉ុណ្ណោះ។

ថ្លែងក្នុងបទសម្ភាសន៍ Fox News កាលពីថ្ងៃចន្ទ (២១ កក្កដា) លោក Araghchi បាននិយាយថា៖ ការចម្រាញ់អ៊ុយរ៉ានីញ៉ូមបានបញ្ឈប់មួយរយៈព្រោះតែការខូចខាតធ្ងន់ធ្ងរ ប៉ុន្តែប្រាកដណាស់ថាអ៊ីរ៉ង់មិនអាចបោះបង់ចោលបានទេព្រោះកម្មវិធីនុយក្លេអ៊ែរនេះជាសមិទ្ធិផលរបស់អ្នកវិទ្យាសាស្ត្រអ៊ីរ៉ង់ផ្ទាល់ ហើយឥឡូវនេះ ការចម្រាញ់អ៊ុយរ៉ានីញ៉ូមគឺជាមោទនភាពជាតិទាំងមូល។

គួររម្លឹកថា អ៊ីស្រាអែល បានវាយប្រហារអ៊ីរ៉ង់នៅថ្ងៃទី១៣ ខែមិថុនា ហើយក្រោយមក គូប្រជែងនៅមជ្ឈិមបូព៌ាទាំងពីរបានចូលរួមក្នុងសង្គ្រាមផ្លូវអាកាស ១២ថ្ងៃ ដែលទីក្រុងវ៉ាស៊ីនតោន ក៏ទម្លាក់គ្រាប់បែកលើកម្មវិធីនុយក្លេអ៊ែររបស់អ៊ីរ៉ង់ផងដែរ ខណៈបទឈប់បាញ់មួយសម្រេចបាននៅចុងខែមិថុនា។ អ៊ីស្រាអែល ជាប្រទេសមជ្ឈិមបូព៌ាតែមួយគត់ដែលគេជឿថាមានអាវុធនុយក្លេអ៊ែរ ហើយអ៊ីស្រាអែលនិយាយថា សង្រ្គាមរបស់ខ្លួនប្រឆាំងនឹងអ៊ីរ៉ង់ គឺក្នុងបំណងរារាំងទីក្រុងតេអេរ៉ង់ មិនឱ្យអភិវឌ្ឍអាវុធនុយក្លេអ៊ែរ៕