កំពង់ផែ Antwerp-Bruges ក្នុងប្រទេសបែលហ្ស៊ិក មើលឃើញរថយន្តរាប់ម៉ឺនគ្រឿងត្រូវចតចោល ខណៈការនាំចេញយានយន្តអឺរ៉ុបធ្លាក់យ៉ាងគំហុក ដោយសារពន្ធថ្មីដែលប្រកាសដោយលោកប្រធានាធិបតីអាមេរិក Donald Trump។ ទិន្នន័យពីកំពង់ផែបង្ហាញថា ការនាំចេញរថយន្តរបស់សហភាពអឺរ៉ុប ទៅកាន់អាមេរិក បានធ្លាក់ចុះ ១៥,៩% នៅដើមឆ្នាំ២០២៥នេះ ព្រោះតែពន្ធដ៏ខ្ពស់របស់ទីក្រុងវ៉ាស៊ីនតោន និងការធ្លាក់ចុះនៃតម្រូវការពិភពលោក។

លោក Alain Guillemyn នាយកគ្រប់គ្រងក្រុមហ៊ុនបែលហ្ស៊ិក បាននិយាយនៅថ្ងៃសុក្រសប្ដាហ៍មុនថា ក្រុមហ៊ុនដឹកជញ្ជូនរថយន្តឈ្មោះថា ប្រតិបត្តិកររថយន្តអន្តរជាតិ (ICO) ក៏បានមើលឃើញការធ្លាក់ចុះ ១៥% ចាប់តាំងពីឆ្នាំមុនមក ដោយសារពន្ធរបស់សហរដ្ឋអាមេរិកដូចគ្នានេះ។

លោក Trump បានគំរាមដំឡើងពន្ធលើទំនិញអឺរ៉ុប ដល់ ៣០% ចាប់ពីថ្ងៃទី០១ ខែសីហា ខាងមុខ ដោយបង្កើនសម្ពាធកាន់តែធ្ងន់លើប្លុកនេះឱ្យធ្វើកិច្ចព្រមព្រៀងមួយ។ ទីក្រុងព្រុចសែល ជាមួយនឹងអ្នកតំណាងមកពីឧស្សាហកម្មរថយន្ត បានចំណាយពេលជាច្រើនខែដើម្បីព្យាយាមបញ្ចុះបញ្ចូលក្រុងវ៉ាស៊ីនតោន ឱ្យទម្លាក់ពន្ធ ២៧,៥% របស់ខ្លួនលើការនាំចូលរថយន្តអឺរ៉ុប ប៉ុន្តែហាក់ពុំមានលទ្ធផលនោះទេ។

គួរឱ្យដឹងថា មុនពេលការដំឡើងពន្ធសកលទ្រង់ទ្រាយធំរបស់លោក Trump សហរដ្ឋអាមេរិកបានដាក់ពន្ធ ២,៥% ប៉ុណ្ណោះលើរថយន្តផលិតនៅអឺរ៉ុប ខណៈដែលសហភាពអឺរ៉ុប ដាក់ពន្ធ ១០% លើរថយន្តដែលនាំចូលមកវិញពីសហរដ្ឋអាមេរិក៕