បទឈប់បាញ់ដែលបានបញ្ចប់សង្គ្រាមផ្លូវអាកាសរយៈពេល ១២ថ្ងៃរបស់អ៊ីរ៉ង់ ជាមួយអ៊ីស្រាអែល បានដំណើរការជិតមួយខែហើយដោយពុំមានឧបទ្ទវហេតុអ្វីនោះទេ ប៉ុន្តែប្រជាជនអ៊ីរ៉ង់ជាច្រើននៅតែមិនសប្បាយចិត្ត ដោយស៊ូទ្រាំជាមួយភាពមិនច្បាស់លាស់ ខណៈភ័យខ្លាចថាអាចមានការប្រឈមមុខដាក់គ្នាមួយថ្មីទៀត និងកាន់តែយូរជាងមុន។

អ្នកស្រុក Shiraz នៅភាគខាងត្បូងអ៊ីរ៉ង់ ដែលជាក្រុងមួយក្នុងចំណោមទីក្រុងជាច្រើនដែលរងការវាយប្រហារកាលពីខែមុននៅពេលអ៊ីស្រាអែលបញ្ចេញយុទ្ធនាការទម្លាក់គ្រាប់បែកលើអ៊ីរ៉ង់ បាននិយាយថា "ពួកគេគិតថា បទឈប់បាញ់នេះនឹងមិននៅស្ថិតស្ថេរបានយូរទេ"។ អ្នកស្រុកជាច្រើនទៀតនិយាយថា ពួកគេខ្លាចថាសង្រ្គាមនឹងចាប់ផ្តើមម្តងទៀតណាស់ ហើយនឹងអាចនាំទៅដល់ការស្លាប់របស់មនុស្សស្លូតត្រង់កាន់តែច្រើន និងការបំផ្លិចបំផ្លាញហេដ្ឋារចនាសម្ព័ន្ធកាន់តែធ្ងន់ធ្ងរ។

ការវាយលុករបស់អ៊ីស្រាអែល បានកំណត់គោលដៅលើទីតាំងនុយក្លេអ៊ែរ និងទីតាំងយោធាសំខាន់ៗ ដោយបានសម្លាប់មេបញ្ជាការជាន់ខ្ពស់ និងអ្នកវិទ្យាសាស្ត្រនុយក្លេអ៊ែរ ព្រមទាំងមនុស្សរាប់រយនាក់ផ្សេងទៀត ហើយបង្កការបំផ្លិចបំផ្លាញនៅក្នុងតំបន់លំនៅដ្ឋានមួយចំនួនផងដែរ។

បន្ទាប់ពីមានបទឈប់បាញ់ អ៊ីស្រាអែលបានឱ្យសញ្ញាថាខ្លួនអាចវិលទៅរកការប្រយុទ្ធវិញភ្លាមៗ ប្រសិនបើអ៊ីរ៉ង់ ព្យាយាមសាងសង់រោងចក្រនុយក្លេអ៊ែរឡើងវិញ ឬអនុវត្តសកម្មភាពណាមួយដែលចាត់ទុកថាជាការគំរាមកំហែង ដូចជាបង្កើនការអភិវឌ្ឍគ្រាប់បែកនុយក្លេអ៊ែរជាដើម ដោយនេះជាមហិច្ឆិតាមួយដែលទីក្រុងតេអេរ៉ង់តែងបដិសេធជាប់រហូត។ យ៉ាងណាក៏ដោយ អ៊ីរ៉ង់បានប្តេជ្ញាឆ្លើយតបយ៉ាងម៉ឺងម៉ាត់ប្រសិនបើមានការវាយប្រហារម្តងទៀត៕