បណ្ដាមន្ត្រីជាន់ខ្ពស់របស់សហរដ្ឋអាមេរិក បានសន្យាជាមួយលោកប្រធានាធិបតីហ្វីលីពីន Ferdinand Marcos កាលពីថ្ងៃចន្ទ (២១ កក្កដា) ថា ទីក្រុងវ៉ាស៊ីនតោននឹងជួយការពារសម្ព័ន្ធមិត្តដ៏យូរអង្វែងរបស់ខ្លួនមួយនេះ និងបង្កើនធនធានយោធា ក្នុងគោលបំណងទប់ទល់ឥទ្ធិពលដ៏ខ្លាំងក្លារបស់ប្រទេសចិន។

ទាំងរដ្ឋមន្ត្រីការពារជាតិអាមេរិក លោក Pete Hegseth និងប្រមុខការទូត លោក Marco Rubio ដែលព្រួយបារម្ភពីឥទ្ធិពលចិន បានបញ្ជាក់ពីការប្តេជ្ញាចិត្តរបស់ពួកគេចំពោះសន្ធិសញ្ញារយៈពេល ៧ទសវត្សរ៍របស់អាមេរិក ជាមួយទីក្រុងម៉ានីល ខណៈរដ្ឋមន្រ្តីទាំងពីរបានជួបប្រជុំដាច់ដោយឡែកជាមួយមេដឹកនាំហ្វីលីពីន កាលពីថ្ងៃចន្ទ។

លោក Hegseth បានប្រាប់លោក Marcos ថា ភាគីទាំងពីររួមគ្នារក្សាការប្តេជ្ញាចិត្តចំពោះសន្ធិសញ្ញាការពារគ្នាទៅមក ហើយកិច្ចព្រមព្រៀងនេះពង្រីកដល់ប្រតិបត្តិការយោធា រួមទាំងវត្តមានឆ្មាំល្បាតឆ្នេរអាមេរិក-ហ្វីលីពីនគ្រប់ទីកន្លែងក្នុងប៉ាស៊ីហ្វិក រួមទាំងសមុទ្រចិនខាងត្បូងផងដែរ។ លោក Marcos បានស្វាគមន៍ការគាំទ្ររបស់អាមេរិក ដោយលើកពី "ការផ្លាស់ប្តូរកម្លាំងភូមិសាស្ត្រនយោបាយ និងការវិវត្តនយោបាយជុំវិញពិភពលោក"។

ចាប់តាំងពីការជាប់ឆ្នោតក្នុងឆ្នាំ២០២២មក លោក Marcos បានជំរុញកិច្ចសហប្រតិបត្តិការរវាងហ្វីលីពីន ដែលជាអតីតអាណានិគមអាមេរិក ជាមួយនឹងទីក្រុងវ៉ាស៊ីតោន ទាំងក្រោមការដឹកនាំរបស់លោកប្រធានាធិបតី Donald Trump បច្ចុប្បន្ន និងអតីតប្រធានាធិបតី Joe Biden។ ចិន និងហ្វីលីពីន បានប៉ះទង្គិចគ្នាជាបន្តបន្ទាប់នៅក្នុងដែនទឹកមានជម្លោះនៅសមុទ្រចិនខាងត្បូង ដែលទីក្រុងប៉េកាំងអះអាងសិទ្ធិស្ទើរតែទាំងស្រុង៕