ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអង្គារ (២២ កក្កដា) នេះថា កូរ៉េខាងជើង គ្រោងនឹងសាងសង់នាវាពិឃាតទម្ងន់ ៥.០០០តោន យ៉ាងតិចមួយគ្រឿងបន្ថែមទៀតនៅត្រឹមខែតុលា ឆ្នាំ២០២៦ ខាងមុខ បន្ទាប់ពីការដាក់ដំណើរនាវាយោធា ២គ្រឿងកាលពីដើមឆ្នាំនេះ។

ទីភ្នាក់ងារសារព័ត៌មាន KCNA បាននិយាយថា កម្មករនៅកំពង់ផែមួយក្នុងទីក្រុងឆ្នេរសមុទ្រភាគខាងលិច Nampho បានធ្វើការជួបជុំគ្នាដ៏ធំកាលពីថ្ងៃចន្ទ ដោយប្តេជ្ញាថានឹង "សាងសង់នាវាពិឃាតថ្មីមួយគ្រឿងទៀតឱ្យបាននៅថ្ងៃទី១០ ខែតុលា ឆ្នាំក្រោយនេះ"។

គួរបញ្ជាក់ថា នៅកូរ៉េខាងជើង ថ្ងៃទី១០ ខែតុលា គឺជាខួបនៃការបង្កើតគណបក្សពលករកូរ៉េ ដែលកំពុងកាន់អំណាច។

កាលពីខែមេសាឆ្នាំនេះ កូរ៉េខាងជើងបានបើកបង្ហាញនាវាពិឃាតទម្ងន់ ៥.០០០តោន ដំបូងគេរបស់ខ្លួនឈ្មោះថា Choe Hyon ខណៈព្យាយាមពង្រឹងសមត្ថភាពធ្វើសង្គ្រាមជើងទឹក។ នៅក្នុងខែមិថុនា នាវាពិឃាតមួយគ្រឿងផ្សេងទៀតប្រភេទដូចគ្នាឈ្មោះ Kang Kon ត្រូវដាក់ឱ្យដំណើរការ បន្ទាប់ពីបានជួសជុលការខូចខាតរួចអំឡុងពេលប៉ុនប៉ងដាក់ដំណើរការលើកដំបូងក្នុងខែឧសភា។

ក្នុងអំឡុងពេលពិធីដាក់ដំណើរការខែមិថុនានោះ មេដឹកនាំកូរ៉េខាងជើង លោក គីម ជុងអ៊ុន បានបញ្ជាឱ្យសាងសង់នាវាពិឃាតប្រភេទ Kang Kon ឬធំជាងនេះចំនួន ២គ្រឿងរៀងរាល់ឆ្នាំ ដោយចាប់ផ្តើមនៅឆ្នាំ២០២៦ តទៅ។ ទីក្រុងព្យុងយ៉ាងហាក់ដូចជាផ្លាស់ប្តូរការយកចិត្តទុកដាក់ទៅក្នុងការកសាងនាវាកងទ័ពជើងទឹក ដែលជាផ្នែកមួយនៃកិច្ចប្រឹងប្រែងធ្វើពិពិធកម្មប្រព័ន្ធដឹកជញ្ជូនសម្រាប់អាវុធនុយក្លេអ៊ែរ និងមីស៊ីលរបស់ខ្លួន ដែលត្រូវរាយការណ៍ថាកំពុងស្ថិតក្នុងដំណាក់កាលចុងក្រោយហើយនៃការអភិវឌ្ឍ៕