រដ្ឋបាលរបស់លោកប្រធានាធិបតី Donald Trump បាននិយាយថានឹងនិរទេសជនជាតិហៃទី ដែលរស់នៅក្នុងសហរដ្ឋអាមេរិក ជាអ្នករស់នៅអចិន្ត្រៃយ៍ស្របច្បាប់ ប្រសិនបើពួកគេត្រូវបានចាត់ទុកថា «បានគាំទ្រ និងសហការ» ជាមួយក្រុមជនអន្ធពាលហៃទី។

ការប្រកាសកាលពីថ្ងៃចន្ទ គឺជាចំណាត់ការចុងក្រោយប្រឆាំងជនជាតិហៃទីដែលកំពុងរស់នៅក្នុងសហរដ្ឋអាមេរិកក្នុងពេលមានការជំរុញការនិរទេសទ្រង់ទ្រាយធំរបស់លោកប្រធានាធិបតី ហើយកើតមានឡើងនៅពេលដែលរដ្ឋបាលរបស់លោក Trump បានព្យាយាមបញ្ចប់ឋានៈស្របច្បាប់សម្រាប់ជនជាតិហៃទី។

ការធ្វើបច្ចុប្បន្នភាពនេះក៏កើតមានឡើង នៅពេលដែលក្រុមសិទ្ធិមនុស្សកំពុងចោទសួរពីរបៀបដែលរដ្ឋបាល Trump កំណត់ការជាប់ទាក់ទងជាមួយអង្គការដែលខ្លួនចាត់ទុកថាជា «អង្គការភេរវកម្ម»។

នៅក្នុងសេចក្តីថ្លែងការណ៍ រដ្ឋមន្ត្រីការបរទេសសហរដ្ឋអាមេរិក លោក Marco Rubio ពុំបានបង្ហាញថាតើមនុស្សចំនួនប៉ុន្មាននាក់ ដែលត្រូវបានដាក់គោលដៅ ឬឈ្មោះណានណាម្នាក់ឡើយ ដោយគ្រាន់តែនិយាយថា «បុគ្គលមួយចំនួន រស់នៅអចិន្ត្រៃយ៍ស្របច្បាប់នៅសហរដ្ឋអាមេរិក បានគាំទ្រ និងសហការជាមួយមេដឹកនាំក្រុមជនអន្ធពាលហៃទី ដែលមានទំនាក់ទំនងជាមួយក្រុមភេរវកម្ម»។

ខណៈរដ្ឋបាល លោកTrump បានព្យាយាមបង្កើនការនិរទេស ក្រសួងការបរទេស បាននឹងកំពុងអំពាវនាវឱ្យមានអំណាចដ៏ទូលំទូលាយនៅក្រោមច្បាប់អន្តោប្រវេសន៍ និងសញ្ជាតិ ដើម្បីព្យាយាមនិរទេសអ្នកដែលរស់នៅក្នុងសហរដ្ឋអាមេរិកតាមទិដ្ឋាការផ្សេងៗ រួមទាំងជាអ្នករស់នៅស្របច្បាប់អចិន្ត្រៃយ៍ ឬជានិស្សិតផងដែរ។