កណ្ដាល៖ ខេត្តកណ្ដាលបានរៀបចំការប្រកួតកីឡាមានសក្ដានុពលប្រចាំខេត្ត ២ប្រភេទកីឡារួមមានកីឡាបាល់ទាត់ និងកីឡាប៉េតង់ដើម្បីអបអរសាទរខួបលើកទី៤៣ នៃទិវាជ័យជម្នះ ៧មករា (៧ មករា ១៩៧៩ - ៧ មករា ២០២២)។ ការប្រកួតនេះគ្រោងធ្វើឡើងជាង ១សប្ដាហ៍ចាប់ពីថ្ងៃទី០៥ ដល់ថ្ងៃទី១៣ ខែមករា ឆ្នាំ២០២២ ខាងមុខ។
លោក ចេង សំអ៊ុល ប្រធានមន្ទីរអប់រំកាយ និងកីឡានៃខេត្តកណ្ដាលបានឲ្យដឹងថា គោលបំណងនៃការប្រកួតពានរង្វាន់ ៧មករានេះ រៀបចំឡើងដើម្បីចូលរួមអបអរសាទរថ្ងៃកំណើតទី២ របស់ប្រជាជនកម្ពុជាក្នុងសម័យសន្ដិភាព ដែលប្រជាពលរដ្ឋគ្រប់វ័យអាចលេងកីឡាបាន មិនថាកីឡាបាល់ទាត់ កីឡាប៉េតង់ ឬកីឡាផ្សេងៗនោះទេ។ ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាលបានគូសបញ្ជាក់ថា ការប្រកួតពេលនេះបានឆ្លុះបញ្ចាំងឲ្យឃើញថា មន្ត្រីរាជការគ្រប់លំដាប់ថ្នាក់ ប្រជាពលរដ្ឋ ពិសេសយុវជន-យុវនារីគឺមានឱកាសចូលរួមលេងកីឡាដើម្បីទទួលបាននូវសុខភាពល្អ មិត្តភាព និងសាមគ្គីភាពរវាងក្រសួង-ស្ថាប័ន-អង្គរភាពរដ្ឋ និងឯកជន ក្រោមដំបូលសន្ដិភាពនាសម័យតេជោ។
ទន្ទឹមជាមួយគ្នា ឯកឧត្តមអភិបាលក៏បានក្រើនរំលឹកដល់ការិយាលល័យកីឡា នៅតាមស្រុកនីមួយៗនៃខេត្តកណ្តាលត្រូវបង្កើនការយកចិត្តទុកដាក់ ចំពោះការបណ្តុះបណ្តាលកីឡានៅតាមបណ្តាស្រុកឲ្យរីកចំរើនទាំងកីឡាវ័យចាស់ និងយុវជន ព្រោះកីឡាជួយសុខភាព និងជួយឲ្យយុវជនឃ្លាតឆ្ងាយពីគ្រឿងញាន ធ្វើឲ្យបញ្ញាស្មារតីឆ្លាតវ៉ៃក្នុងការសិក្សា ពិសេសក៏រួមចំណែកយុទ្ធនាការឆ្ពោះទៅស៊ីហ្គេមឆ្នាំ២០២៣ ផងដែរ។ ជាមួយការប្រកួតពានរង្វាន់ ៧មករាលក្ខណៈមហាជននេះដែរ សម្រាប់កីឡាបាល់ទាត់គឺមាន ១៩ក្រុមចូលរួម ខណៈកីឡាប៉េតង់មាន ២២ក្រុមចូលរួមដែលការប្រកួតនឹងបញ្ចប់នាថ្ងៃទី១៣ ខែមករា ឆ្នាំ២០២២ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
