រដ្ឋមន្ត្រីក្រសួងមហាផ្ទៃអាល្លឺម៉ង់ លោក Alexander Dobrindt និងរដ្ឋមន្ត្រីក្រសួងមហាផ្ទៃប៉ូឡូញ លោក Tomasz Siemoniak បានទៅពិនិត្យព្រំដែនប្រទេសបេឡារុស្ស-ប៉ូឡូញ កាលពីថ្ងៃចន្ទ ដើម្បីពិភាក្សាអំពីវិធានការការធ្វើអន្តោប្រវេសន៍ និងសន្តិសុខព្រំដែន។

ក្នុងអំឡុងសន្និសីទសារព័ត៌មាន លោក Dobrindt បាននិយាយថា វិធានការសម្របសម្រួលជាមួយដៃគូអឺរ៉ុបបានកាត់បន្ថយការធ្វើអន្តោប្រវេសន៍ខុសច្បាប់យ៉ាងច្រើននៅក្នុងទ្វីបអឺរ៉ុប។

លោកបាននិយាយបន្ថែមថា «យើងបានឃើញបញ្ហានេះ ក្នុងវិធីដ៏គួរឲ្យចាប់អារម្មណ៍ក្នុងរយៈពេលប៉ុន្មានខែថ្មីៗនេះ។ លោក Siemoniak បានសង្កត់ធ្ងន់លើសារៈសំខាន់នៃសេរីភាពក្នុងការធ្វើដំណើរនៅតំបន់ Schengen ផងដែរ។ រដ្ឋមន្ត្រីទាំងពីរបានចុះពិនិត្យរបងព្រំដែន និងសង្កេតឃើញឆ្មាំព្រំដែនកំពុងដើរល្បាតនៅតំបន់នោះ។ នៅប្រទេសប៉ូឡូញ ការជជែកដេញដោលជុំវិញការធ្វើអន្តោប្រវេសន៍បានឡើងកម្តៅកាន់តែក្តៅខ្លាំងឡើងក្នុងប៉ុន្មានសប្តាហ៍ថ្មីៗនេះ។

កាលពីដើមខែកក្កដា ប្រទេសប៉ូឡូញ បានដាក់ចេញការគ្រប់គ្រងបណ្តោះអាសន្ននៅតាមព្រំដែនរបស់ខ្លួនជាមួយប្រទេសអាល្លឺម៉ង់ និងប្រទេសលីទុយអានី ជាអ្វីដែលរដ្ឋាភិបាលបាននិយាយថាជាចំណាត់ការមួយដើម្បីត្រួតពិនិត្យជនអន្តោប្រវេសន៍ឱ្យបានហ្មត់ចត់បន្ថែមទៀតក្នុងពេលមានការព្រួយបារម្ភជាសាធារណៈអំពីបញ្ហាអន្តោប្រវេសន៍។