ក្រុមបាតុករនៅទូទាំងសហរដ្ឋអាមេរិក បានប្រាប់កាសែត Guardian ក្នុងអំឡុងពេលមួយថ្ងៃនៃការប្រមូលផ្តុំតវ៉ាកាលពីថ្ងៃព្រហស្បតិ៍សប្តាហ៍មុនថា សមាជិកបក្សប្រជាធិបតេយ្យ ត្រូវតែចាត់វិធានការយ៉ាងម៉ឺងម៉ាត់ និងខ្លាំងក្លាជាងមុន ដើម្បីប្រឆាំងនឹងរដ្ឋបាលលោកប្រធានាធិបតី Donald Trump។

ខណៈសមាជិកបក្សប្រជាធិបតេយ្យជាប់ឆ្នោតមួយចំនួនបានបង្កើនយុទ្ធសាស្ត្ររបស់ពួកគេប្រឆាំងនឹងលោក Trump និងរដ្ឋបាលរបស់លោក -- ដូចជាការថ្លែងសុន្ទរកថាជាច្រើនម៉ោង ការប្រថុយនឹងការចាប់ខ្លួន និងការធ្វើអន្តរាគមបែបរំខានក្នុងសភាជាដើមនោះ -- ក្រុមអ្នកតវ៉ានិយាយថាមិនទាន់គ្រប់គ្រាន់ទេ ហើយពួកគេចង់ឃើញបក្សប្រជាធិបតេយ្យរួបរួមក្នា មានការរៀបចំ និងកម្រោលជាងនេះក្នុងការតតាំងនឹងលោក Trump។

ក្រុមបាតុករក៏និយាយផងដែរថា ពួកគេចង់ឃើញអ្នកប្រជាធិបតេយ្យក្រោកឈរឡើងទាមទារគុណតម្លៃផ្ទាល់ខ្លួនរបស់ពួកគេ ជាជាងការឈរនៅចំកណ្តាល ឬឈរនៅម្ខាងៗ ក្នុងអំឡុងពេលបោះឆ្នោតនានាដើម្បីយកជ័យជម្នះលើបក្សសាធារណរដ្ឋរបស់លោក Trump។

ចាប់តាំងពីលោក Trump ឡើងកាន់តំណែងនៅខែមករា ឆ្នាំនេះមក ប្រជាជនអាមេរិកនៅទូទាំងប្រទេសបានចេញតវ៉ាជាញឹកញាប់ប្រឆាំងនឹងការប៉ុនប៉ងរបស់លោកក្នុងការពង្រីកអំណាច។ នៅក្នុងបាតុករដ៏ធំមួយនៅថ្ងៃទី១៤ ខែមិថុនា ដែលរៀបចំឡើងក្រោមឈ្មោះថា "គ្មានស្ដេច" អ្នកតវ៉ារាប់លាននាក់បានរិះគន់យុទ្ធនាការអន្តោប្រវេសន៍របស់លោក Trump ការកាត់បន្ថយកម្មវិធីរដ្ឋាភិបាល និងអ្វីដែលមនុស្សជាច្រើនបានពិពណ៌នាថាជាអំណាចផ្តាច់ការ ដែលកំពុងកើនឡើងរបស់លោក៕