ទាំងជំនួយការរបស់លោក Donald Trump និងមេដឹកនាំចិន លោក Xi Jinping បានពិភាក្សាគ្នា អំពីលទ្ធភាពនៃការមានជំនួប រវាងមេដឹកនាំទាំង២ ក្នុងអំឡុងពេលដំណើរទស្សនកិច្ចរបស់ប្រធានាធិបតីអាមេរិកទៅកាន់តំបន់អាស៊ី នាចុងឆ្នាំនេះ។ នេះបើយោងតាមបុគ្គល ២រូបដែលដឹងអំពីផែនការនេះ។

ប្រភពបានប្រាប់ថា បើទោះបីជាគម្រោងសម្រាប់កិច្ចប្រជុំនេះ មិនទាន់ត្រូវបានបញ្ចប់នៅឡើយក្ដី ក៏កិច្ចពិភាក្សារបស់មន្ត្រីនៃភាគីនៅសងខាងតំបន់ប៉ាស៊ីហ្វិក បានរួមបញ្ចូលនូវលទ្ធភាពនៃការឈប់រយៈពេលខ្លីរបស់លោក Trump ដែលកៀកនឹងពេលវេលានៃកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសកូរ៉េខាងត្បូង ឬកិច្ចពិភាក្សា នៅខាងក្រៅព្រឹត្តិការណ៍ថ្ងៃទី៣០ ខែតុលា ដល់ថ្ងៃទី១ ខែវិច្ឆិកា។

លោក Trump បានព្យាយាមសម្រាលភាពតានតឹងជាមួយទីក្រុងប៉េកាំង នៅប៉ុន្មានសប្តាហ៍ថ្មីៗនេះ បន្ទាប់ពីផ្អាកសង្គ្រាមពន្ធសងសឹកគ្នាទៅវិញទៅមក ដែលបានធ្វើឲ្យមានភាពច្របូកច្របល់ដល់ពាណិជ្ជកម្ម និងខ្សែច្រវាក់ផ្គត់ផ្គង់សកល។

អ្នកនាំពាក្យស្ថានទូតចិន ប្រចាំនៅទីក្រុងវ៉ាស៊ីនតោន បានឲ្យដឹងនៅក្នុងសន្និសីទសារព័ត៌មានមួយកាលពីសប្តាហ៍មុនថា ប្រទេសចិនក៏បានស្វែងរកការចូលរួមពីភ្ញៀវអន្តរជាតិផងដែរ ក្នុងនោះរួមទាំងឥស្សរជនមួយចំនួនមកពីសហរដ្ឋអាមេរិក សម្រាប់ព្រឹត្តិការណ៍នៅក្រុងប៉េកាំង នាថ្ងៃទី៣ ខែកញ្ញា ដើម្បីរំលឹកខួបលើកទី៨០ នៃការបញ្ចប់សង្គ្រាមលោកលើកទី២។

យ៉ាងណាក្ដី កាលពីថ្ងៃចន្ទ (ទី២១ ខែកក្កដា) ដោយបានបដិសេធមិនធ្វើអត្ថាធិប្បាយ ពាក់ព័ន្ធនឹងលទ្ធភាពនៃការមានកិច្ចប្រជុំ Trump-Xi អ្នកនាំពាក្យក្រសួងការបរទេសចិន លោក Guo Jiakun បានប្រាប់ថា៖ «ការទូត រវាងប្រមុខរដ្ឋ ដើរតួនាទីជាយុទ្ធសាស្ត្រដែលមិនអាចជំនួសបាន នៅក្នុងទំនាក់ទំនងចិន-អាមេរិក»។

សេតវិមានក៏បានបដិសេធមិនធ្វើអត្ថាធិប្បាយអ្វីដែរ។ តែរដ្ឋមន្ត្រីក្រសួងរតនាគារអាមេរិក លោក Scott Bessent បានប្រាប់នៅថ្ងៃទី២១ ខែកក្កដានោះថា នឹងមាន «ការពិភាក្សានាពេលខាងមុខដ៏ខ្លី» រវាងប្រទេសទាំង២៕