តម្លៃប្រេងបានធ្លាក់ចុះ នៅថ្ងៃអង្គារ (ទី២២ ខែកក្កដា) នេះ ខណៈក្តីបារម្ភ ដែលអាចកើតចេញពីសង្គ្រាមពាណិជ្ជកម្ម រវាងអ្នកប្រើប្រាស់ប្រេងឆៅធំៗ សហរដ្ឋអាមេរិក និងសហភាពអឺរ៉ុប (EU) នឹងបន្ទច់បង្អាក់កំណើនតម្រូវការប្រេងឥន្ធនៈដោយការថយចុះនូវសកម្មភាពសេដ្ឋកិច្ច ដែលធ្វើឲ្យវិនិយោគិនកាន់តែលែងសូវមានទំនុកចិត្ត។

ហ៊ុនតម្លៃប្រេងឆៅ Brent បានធ្លាក់ថ្លៃ ៥២សេន ឬ ០,៧៥ភាគរយ ដោយមកនៅត្រឹមតម្លៃ ៦៨,៦៩ដុល្លារ ក្នុងមួយបារ៉ែល គិតត្រឹមម៉ោង ៣:២៥នាទី ម៉ោងសកល។ ចំណែកប្រេងឆៅរបស់អាមេរិក West Texas Intermediate (WTI) មានតម្លៃ ៦៦,៦៩ដុល្លារ ក្នុងមួយបារ៉ែល ដោយធ្លាក់ថ្លៃ ៥១សេន ឬ ០,៧៦ភាគរយ។

តម្លៃគោលនៃប្រេងឆៅទាំង បានធ្លាក់ចុះបន្តិចកាលពីថ្ងៃចន្ទ (ទី២១ ខែកក្កដា)។ កិច្ចសន្យាទិញប្រេង WTI សម្រាប់ខែសីហា នឹងផុតកំណត់នៅថ្ងៃអង្គារនេះ ហើយកិច្ចសន្យាកាន់តែសកម្ម សម្រាប់ខែកញ្ញា បានធ្លាក់ចុះ ៥៤សេន ឬ ០,៨២ភាគរយ ពោលគឺធ្លាក់មកនៅត្រឹម ៦៥,៤១ដុល្លារ ក្នុងមួយបារ៉ែល។

លោកស្រី Priyanka Sachdeva អ្នកវិភាគទីផ្សារជាន់ខ្ពស់ នៅឯក្រុមហ៊ុន Phillip Nova បានលើកឡើងថា៖ ក្ដីបារម្ភអំពីតម្រូវការទូលំទូលាយ នៅតែបន្តមានជាប់ជានិច្ច ស្របពេលមានភាពតានតឹងពាណិជ្ជកម្មសកលកាន់តែខ្លាំងឡើងៗ ជាពិសេសនៅពេលដែលទីផ្សារតាមដានយ៉ាងយកចិត្តទុកដាក់ដល់ការគំរាមកំហែងដំឡើងពន្ធគយចុងក្រោយបំផុត រវាងប្រទេសសេដ្ឋកិច្ចធំៗ និងការប្រកាសនាពេលខាងមុខរបស់លោក Trump នៅមុនថ្ងៃផុតកំណត់ទី១ ខែសីហា»។

លោកស្រីបានបន្ថែមថា៖ «វិនិយោគិនក៏កំពុងសម្លឹងមើលយ៉ាងដិតដល់ផងដែរ អំពីផលប៉ះពាល់នៃការដាក់ទណ្ឌកម្មថ្មីៗរបស់សហរដ្ឋអាមេរិកលើប្រេងឆៅរបស់រុស្ស៊ីផងដែរ»។

ក្ដីបារម្ភអំពីការផ្គត់ផ្គង់ បានធូរស្រាលយ៉ាងច្រើន ដោយប្រទេសផលិតធំៗបង្កើនទិន្នផល និងចាប់តាំងពីបទឈប់បាញ់ កាលពីថ្ងៃទី២៤ ខែមិថុនា បានបញ្ចប់ជម្លោះ រវាងអ៊ីស្រាអែល និងអ៊ីរ៉ង់។ តែទោះជាយ៉ាងណាក៏ដោយ អ្នកវិនិយោគមានក្ដីបារម្ភកាន់តែខ្លាំងឡើងៗ អំពីសេដ្ឋកិច្ចពិភពលោក ក្នុងអំឡុងពេលមានការផ្លាស់ប្តូរគោលនយោបាយពាណិជ្ជកម្មរបស់សហរដ្ឋអាមេរិក៕