អង្គការសុខភាពពិភពលោក (WHO) បានថ្កោលទោសការវាយប្រហាររបស់អ៊ីស្រាអែល កាលពីថ្ងៃចន្ទ (ទី២១ ខែកក្កដា) លើកន្លែងស្នាក់នៅរបស់បុគ្គលិក និងឃ្លាំងសំខាន់ៗរបស់ខ្លួន ក្នុងទីក្រុង Deir el-Balah នៅភាគកណ្តាលនៃតំបន់ហ្កាហ្សា។

ប្រមុខទីភ្នាក់ងារសុខភាពរបស់អង្គការសហប្រជាជាតិ (UN) លោក Tedros Adhanom Ghebreyesus បានរៀបរាប់នៅលើបណ្ដាញសង្គម X ថា៖ «លំនៅឋានបុគ្គលិករបស់ WHO នៅទីក្រុង Deir el-Balah ក្នុងតំបន់ហ្កាហ្សា ត្រូវបានវាយប្រហារ ៣ដង នៅថ្ងៃនេះ ក៏ដូចជាឃ្លាំងសំខាន់ៗរបស់ស្ថាប័នផងដែរ»។

លោកបានបញ្ជាក់ថា «យោធាអ៊ីស្រាអែលបានចូលទៅក្នុងបរិវេណនៅស្នាក់នោះ ហើយបង្ខំស្ត្រី និងកុមារឲ្យជម្លៀសចេញដោយថ្មើរជើងឆ្ពោះទៅកាន់ទីក្រុង Al-Mawasi (នៅភាគខាងត្បូងហ្កាហ្សា) ក្នុងពេលមានជម្លោះដ៏សកម្ម» ដោយបានបន្ថែមថា «បុគ្គលិកបុរស និងសមាជិកគ្រួសារមួយចំនួន ត្រូវបានដាក់ខ្នោះដៃ ដោះសម្លៀកបំពាក់ សួរចម្លើយនៅនឹងកន្លែង និងឆែកឆេរ ដោយផ្ចង់កាំភ្លើង»។

លោក Tedros បានឲ្យដឹងទៀតថា បុគ្គលិក WHO និងសមាជិកគ្រួសារចំនួន ៣២នាក់ ត្រូវបានជម្លៀសទៅកាន់ការិយាល័យរបស់ទីភ្នាក់ងារ នៅពេលដែលអាចមានលទ្ធភាពចូលទៅបាន។ លោកបានបន្ថែមថា ក្នុងពេលជាមួយគ្នានោះ បុគ្គលិក WHO ២រូប និងសមាជិកគ្រួសារ ២នាក់ ត្រូវបានឃុំខ្លួន ហើយខណៈពេលដែល ៣នាក់ ត្រូវបានដោះលែង «បុគ្គលិកម្នាក់នៅតែស្ថិតក្នុងការឃុំខ្លួន»។ ហើយុលោកបានទទូចថា «WHO ទាមទារឲ្យមានការដោះលែងបុគ្គលិកដែលត្រូវបានឃុំខ្លួនជាបន្ទាន់ និងការការពារបុគ្គលិកទាំងអស់»។

ការអត្ថាធិប្បាយរបស់លោកបានកើតមានឡើងនៅពេលដែលទីក្រុង Deir el-Balah ប្រឈមនឹងការបាញ់ផ្លោងយ៉ាងខ្លាំងក្លា បន្ទាប់ពីយោធារបស់អ៊ីស្រាអែលកាលពីថ្ងៃអាទិត្យចុងសប្ដាហ៍កន្លងមក បានបញ្ជាឲ្យអ្នកស្រុកចាកចេញ ដោយព្រមានអំពីវិធានាការជិតកើតមាន នៅក្នុងតំបន់ ដែលខ្លួនមិនធ្លាប់ធ្វើប្រតិបត្តិការពីមុនមកឡើយ៕