ប្រធានាធិបតីកូរ៉េខាងត្បូង លោក Lee Jae Myung នៅថ្ងៃអង្គារ (ទី២២ ខែកក្កដា) នេះ បានប្រាប់មន្ត្រីសាធារណៈថា «ត្រូវប្រឹងប្រែងគ្រប់យ៉ាង» ដើម្បីស្វែងរកអ្នកបាត់ខ្លួន និងស្ដារឡើងវិញនូវការខូចខាត បន្ទាប់ពីភ្លៀងធ្លាក់ខ្លាំងជាច្រើនថ្ងៃ បានធ្វើឲ្យផ្លូវរងការបំផ្លិចបំផ្លាញ នៅតាមតំបន់ផ្សេងៗនៃប្រទេស។

ស្ថានភាពអាកាសធាតុសើម ឥឡូវនេះបានធូរស្រាល ទោះបីជារបាយការណ៍ពីប្រព័ន្ធផ្សព្វផ្សាយ បានឲ្យដឹងថា ភ្លៀងធ្លាក់ខ្លាំងជោគជាំកំពុងមាននៅផ្នែកខ្លះនៃប្រទេសកូរ៉េខាងជើងក៏ដោយ។

ក្រសួងមហាផ្ទៃ និងសុវត្ថិភាព បានឲ្យដឹងថា មនុស្សយ៉ាងតិច ១៩នាក់ បានបាង់បង់ជីវិត និង ៩នាក់ទៀតកំពុងបាត់ខ្លួននៅក្នុងប្រទេសកូរ៉េខាងត្បូង គិតត្រឹមព្រឹកថ្ងៃអង្គារនេះ ខណៈមនុស្ស ២.៥៤៩នាក់ នៅតែត្រូវរស់នៅក្រៅតំបន់លំនៅឋានរបស់ខ្លួន។

ជាមួយគ្នានេះ ក្រសួងបានបញ្ជាក់ថា ការខូចខាតទ្រព្យសម្បត្តិមានទំហំធំធេងណាស់ ដោយមានអគារប្រមាណជា ៣.៧៧៦ខ្នង ដែលរួមទាំងផ្ទះសម្បែង ហាង និងរោងចក្រដែលត្រូវការសម្អាតទឹក កម្ទេចកម្ទី និងល្បាប់ភក់។

ដោយកត់សម្គាល់ពីដែនកំណត់នៃវិធីសាស្រ្តដែលមានស្រាប់ ក្នុងការទប់ទល់នឹងទឹកភ្លៀង កាលពីសប្តាហ៍មុន លោក Lee បានបញ្ជាឲ្យនាយករដ្ឋមន្ត្រី និងក្រសួងពាក់ព័ន្ធទាំងអស់ បង្កើតប្រព័ន្ធឆ្លើយតបដ៏ទូលំទូលាយ សម្រាប់គ្រោះមហន្តរាយធម្មជាតិតាមតំបន់ និងប្រភេទ។

លោក Lee ក៏បានប្រាប់កិច្ចប្រជុំគណៈរដ្ឋមន្ត្រីផងដែរ «ឲ្យបង្ក្រាបយ៉ាងតឹងរ៉ឹង ចំពោះមន្ត្រីសាធារណៈដែលមិនបានគិតគូរឲ្យបានវែងឆ្ងាយ ហើយចូលចិត្តរាំច្រៀង និងបរិភោគស្រា នៅតាមទីតាំងដែលមានមនុស្សស្លាប់»៕