ប្រធានាធិបតីអាមេរិក លោក ដូណាល់ ត្រាំ បាននិយាយបន្ទាប់ពីសេចក្តីថ្លែងការណ៍របស់រដ្ឋមន្ត្រីការបរទេសអ៊ីរ៉ង់ លោក Abbas Araghchi ស្តីពីការខូចខាតយ៉ាងធ្ងន់ធ្ងរ បន្ទាប់ពីការវាយប្រហារលើកមុន។

លោកប្រធានាធិបតី បានសរសេរនៅលើទំព័រ Truth Social របស់លោកថា៖«រដ្ឋមន្ត្រីការបរទេសអ៊ីរ៉ង់ លោក Abbas Araghchi បានលើកឡើងអំពីលើទីតាំងនុយក្លេអ៊ែរអ៊ីរ៉ង់ថា៖«ការខូចខាត គឺធ្ងន់ធ្ងរណាស់ ពួកវា ត្រូវបានបំផ្លាញ»។ ប្រាកដណាស់ ពួកវាត្រូវរងការខូចខាតយ៉ាងដំណំ ដូចជាខ្ញុំបាននិយាយ ហើយយើងនឹងធ្វើការវាយប្រហារជាថ្មីម្តងទៀត បើចាំបាច់នោះ!»។  

លោក ត្រាំ ក៏បានជំរុញឲ្យប៉ុស្តិ៍ទូរទស្សន៍ CNN បណ្តេញ «អ្នកយកព័ត៌មានក្លែងក្លាយរបស់ពួកគេ» និង   សុំការអភ័យទោសដល់លោកប្រធានាធិបតីសហរដ្ឋអាមេរិក និងអាកាសយានិកកងទ័ពអាកាស ដែលអ្នកសារព័ត៌មាននោះ បាននិយាយថា បានបំផ្លាញទីតាំងនុយក្លេអ៊ែរជាច្រើន។

លោក Araghchi បាននិយាយនៅក្នុងបទសម្ភាសន៍ជាមួយសារព័ត៌មាន Fox News នាពេលមុននេះបន្តិចថា គ្រឿងបរិក្ខារនុយក្លេអ៊ែរអ៊ីរ៉ង់ ត្រូវបាន«ខូចខាតយ៉ាងធ្ងន់ធ្ងរ» ដោយបន្ថែមថា ទីក្រុងតេអេរ៉ង់ មិនមានបំណងបោះបង់ការចម្រាញ់សារធាតុអ៊ុយរ៉ានីញ៉ូម ដែលជាបញ្ហាចោទនៃមោទនភាពជាតិ។

កាលពីថ្ងៃទី ២៥ ខែមិថុនា លោក ត្រាំ និងរដ្ឋមន្ត្រីការពារជាតិអាមេរិកលោក Pete Hegseth បានដកស្រង់ទិន្នន័យស៊ើបការណ៍ថ្មី ដោយអះអាងថា ទីតាំងនុយក្លេអ៊ែររបស់អ៊ីរ៉ង់នៅទីក្រុង Fordow, Natanz និង Isfahan ដែលបានវាយប្រហារនៅយប់ថ្ងៃទី ២១-២២ ខែមិថុនា ត្រូវបានបំផ្លាញចោល។ សេតវិមាន បាន បន្ថែមថា យោងតាមទិន្នន័យរបស់ទីក្រុងវ៉ាស៊ីនតោន អ៊ីរ៉ង់បានបរាជ័យក្នុងការដកសម្ភារៈនុយក្លេអ៊ែរចេញពីទីតាំងទាំងនេះ មុនពេលមានការវាយប្រហារនោះ។