រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent កាលពីថ្ងៃចន្ទ (ទី២១ ខែកក្កដា) បានអំពាវនាវឲ្យធនាគារសហព័ន្ធ (Fed) របស់សហរដ្ឋអាមេរិក ធ្វើ «ការត្រួតពិនិត្យផ្ទៃក្នុងទាំងស្រុងនូវប្រតិបត្តិការគោលនយោបាយមិនមែនរូបិយវត្ថុរបស់ខ្លួន» ដោយចោទប្រកាន់ធនាគារកណ្តាលមួយនេះថា «ចាត់វិធានការយឺតយ៉ាវ»។

តាមរយៈការបង្ហោះសារដ៏វែងមួយ នៅលើបណ្ដាញសង្គម X លោក Bessent បានព្យាយាមបញ្ជាក់ពីការកត់សម្គាល់របស់លោកនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ CNBC កាលពីព្រឹកថ្ងៃនោះ ដែលលោកបាននិយាយថា៖ «អ្វីដែលយើងត្រូវធ្វើ គឺពិនិត្យមើលស្ថាប័ន Fed ទាំងមូល និងថា តើពួកគេបានទទួលជោគជ័យដែរ ឬទេ»។

ការកត់សម្គាល់នេះ បានកើតមានឡើង ជាការឆ្លើយតបទៅនឹងសំណួរ អំពីការបណ្តេញប្រមុខ Fed គឺលោក Jerome Powell ដែលត្រូវបានប្រធានាធិបតីអាមេរិក លោក Donald Trump វាយប្រហារម្តងហើយម្តងទៀត ក្នុងប៉ុន្មានសប្តាហ៍ថ្មីៗនេះ ជុំវិញការមិនកាត់បន្ថយអត្រាការប្រាក់។

សេតវិមាន បានបញ្ជាក់ថា លោក Trump មិនមានគម្រោងបណ្តេញលោក Powell នៅមុនការបញ្ចប់អាណត្តិរបស់លោក ក្នុងខែឧសភា ឆ្នាំ២០២៦ ជាចំណាត់ការដ៏ចម្រូងចម្រាសផ្នែកច្បាប់ដែលនឹងនាំឲ្យមានការចោទសួរអំពីឯករាជ្យភាពរបស់ Fed។

អំឡុងការបង្ហោះសាររបស់លោក នៅលើបណ្ដាញសង្គម X លោក Bessent បានប្រាប់ថា៖ «ឯករាជ្យភាពរបស់ Fed គឺជាមូលដ្ឋានគ្រឹះនៃការបន្តកំណើនសេដ្ឋកិច្ច និងស្ថិរភាពរបស់សហរដ្ឋអាមេរិក»។

លោកបានអំពាវនាវឲ្យមានការពិនិត្យឡើងវិញនូវគម្រោងជួសជុលសំណង់អគារចំណាយថវិកាច្រើន ខណៈលោកបានកត់សម្គាល់ថា លោកមិនមានចំណេះដឹង ឬយោបល់ ពាក់ព័ន្ធនឹងមូលដ្ឋានច្បាប់ សម្រាប់ការជួសជុលអគារធំៗនោះទេ៕