ប្រទេសក្រិកបានដាក់ចេញនូវវិធានការសង្គ្រោះបន្ទាន់ នៅថ្ងៃអង្គារ (ទី២២ ខែកក្កដា) ដើម្បីជួយកម្មករទប់ទល់នឹងសីតុណ្ហភាពឡើងដល់ ៤៣អង្សាសេ អំឡុងពេលមានរលកកម្ដៅ ដែលត្រូវបានរំពឹងមានពេញមួយសប្តាហ៍។

ទីក្រុងនានា បានបើកចំហជាសាធារណៈនូវបន្ទប់ដែលមានម៉ាស៊ីនត្រជាក់ ហើយក្រសួងការងារបានបញ្ជាឲ្យផ្អាកការងារក្រៅម៉ោង ចាប់ពីម៉ោង ១២:០០ ដល់ម៉ោង ៥:០០ល្ងាច ម៉ោងក្នុងស្រុក (ត្រូវនឹងម៉ោង ៩:00 ដល់ ១៤:០០ ម៉ោងសកល) នៅក្នុងតំបន់ភាគច្រើននៃប្រទេស ក្នុងនោះរួមទាំងទីក្រុងអាតែនផងដែរ។

សេវាអាកាសធាតុជាតិ EMY បានឲ្យដឹងថា រលកកម្តៅដែលបានចាប់ផ្តើមមានកាលពីថ្ងៃចន្ទ មិនត្រូវបានរំពឹងថា នឹងមានភាពធូរស្រាល នៅមុនថ្ងៃអាទិត្យចុងសប្ដាហ៍នេះនោះទេ។

សីតុណ្ហភាព នៅក្នុងរដ្ឋធានី និងទីក្រុង Thessaloniki ត្រូវបានគេព្យាករថា នឹងឡើងដល់ ៤០អង្សាសេ នៅថ្ងៃអង្គារនេះ ដោយកម្រិតឡើងខ្ពស់រហូតដល់ ៤៣អង្សាសេ នៅភាគកណ្តាលប្រទេសក្រិក។

ទីភ្នាក់ងារ EMY បានឲ្យដឹងបន្ថែមថា រលកកម្ដៅត្រូវបានគេរំពឹងថា នឹងឡើងដល់កម្រិតខ្ពស់បំផុទ នៅទីក្រុងអាតែន នៅថ្ងៃព្រហស្បតិ៍ ដោយមានសីតុណ្ហភាពឡើងដល់កម្រិត ៤១អង្សាសេ៕