គណៈកម្មការអឺរ៉ុប បានឲ្យដឹងថា សហភាពអឺរ៉ុប (EU) បានដកទណ្ឌកម្មពីនាវាដឹកប្រេងចំនួន ៣គ្រឿង ដែលដំណើរការដោយក្រុមហ៊ុន Mitsui O.S.K របស់ប្រទេសជប៉ុន ដែលបានដឹកឧស្ម័នធម្មជាតិរាវ (LNG) មានប្រភពពីរុស្ស៊ី បន្ទាប់ពីក្រុមហ៊ុនបានប្តេជ្ញាចិត្តថា ខ្លួននឹងមិនធ្វើប្រតិបត្តិការដូច្នេះទៀតទេ។

ទណ្ឌកម្មនោះត្រូវបានដាក់លើនាវាដឹកប្រេង North Moon, North Ocean និង North Light ដែលកំពុងដឹកជញ្ជូនឧស្ម័នពីរោងចក្រ Yamal LNG ហើយបានចូលរួមក្នុងប្រតិបត្តិការផ្ទេរពីនាវាទៅនាវា នៅជិតកំពង់ផែ Murmansk ភាគខាងជើងនៃប្រទេសរុស្ស៊ី។ ចំណាត់ការនេះ គឺជាផ្នែកមួយនៃកញ្ចប់ទណ្ឌកម្មទី១៨ របស់ EU ប្រឆាំងនឹងរុស្ស៊ី ជុំវិញសង្គ្រាមរបស់ប្រទេសនេះ នៅអ៊ុយក្រែន។

នៅលើគេហទំព័ររបស់ខ្លួន គណៈកម្មការអឺរ៉ុបបានឲ្យដឹងថា ខ្លួនបានដកនាវាទាំង ៣គ្រឿងចេញពីបញ្ជីនៃការដាក់ទណ្ឌកម្មលើនាវារបស់ខ្លួន «បន្ទាប់ពីទទួលបាននូវការប្តេជ្ញាចិត្តយ៉ាងម៉ឺងម៉ាត់ថា នាវាដឹកឧស្ម័ន LNG ទាំងនេះ នឹងលែងចូលរួមក្នុងការដឹកជញ្ជូនថាមពលរបស់រុស្ស៊ី (ពី) គម្រោង Yamal និង Arctic 2 របស់រុស្ស៊ី ដែលដើមឡើយពួកគេត្រូវបានចាត់តាំងឲ្យធ្វើប្រតិបត្តិការ»។

គណៈកម្មការបានបញ្ជាក់បន្ថែមថា៖ «វិធានការនេះបង្ហាញពីផលប៉ះពាល់នៃការកំណត់ដាក់ទណ្ឌកម្មលើនាវារបស់សហភាពអឺរ៉ុប ហើយនាវាទាំងនោះ អាចត្រលប់ទៅបម្រើសេវាកម្មវិញបាន បន្ទាប់ពីផ្ដល់ការប្តេជ្ញាចិត្តយ៉ាងម៉ឺងម៉ាត់»៕