នៅថ្ងៃអង្គារនេះ ជនប៉ាឡេស្ទីន បានជួបជុំគ្នានៅទីតាំងរងការវាយប្រហារដោយកាំភ្លើងធំរបស់រថក្រោះអ៊ីស្រាអែល ដែលត្រូវចំជំរំសំពត់តង់នៅភាគខាងលិចទីក្រុងហ្កាហ្សា ។

យោងតាមការអះអាងរបស់គ្រូពេទ្យ បានឲ្យដឹងថា មនុស្សយ៉ាងហោច ១២នាក់ ត្រូវបានសម្លាប់ និងមនុស្សរាប់សិបនាក់ផ្សេងទៀត បានរងរបួសនៅក្នុងការវាយប្រហារមួយនេះ ។

គ្រូពេទ្យបឋម និយាយថា រថក្រោះដែលឈរជើងនៅភាគខាងជើងជំរំ Shati បានផ្លោងគ្រាប់កាំភ្លើងធំ ២គ្រាប់លើសំពត់តង់ ដែលផ្តល់ជាកន្លែងស្នាក់នៅដល់គ្រួសារប៉ាឡេស្ទីន ដោយបានសម្លាប់មនុស្សយ៉ាងហោច ១២នាក់ ។

នៅពុំទាន់មានសេចក្តីអត្ថាធិប្បាយភ្លាមៗនោះទេពីយោធាអ៊ីស្រាអែល លើឧបទ្ទេវហេតុមួយនេះ ។

ខណៈពេលនោះដែរ អង្គការសុខភាពពិភពលោក (WHO) បានថ្កោលទោសការវាយប្រហាររបស់អ៊ីស្រាអែល លើកន្លែងស្នាក់នៅរបស់បុគ្គលិក និងឃ្លាំងសំខាន់ៗរបស់ខ្លួន ក្នុងទីក្រុង Deir el-Balah នៅភាគកណ្តាលនៃតំបន់ហ្កាហ្សា។

ប្រមុខទីភ្នាក់ងារសុខភាពរបស់អង្គការសហប្រជាជាតិ (UN)មួយនេះ លោក Tedros Adhanom Ghebreyesus បានរៀបរាប់នៅលើបណ្ដាញសង្គម X ថា លំនៅឋានបុគ្គលិករបស់ WHO នៅទីក្រុង Deir el-Balah ត្រូវបានវាយប្រហារ ៣ដង កាលពីថ្ងៃចន្ទ ក៏ដូចជាឃ្លាំងសំខាន់ៗរបស់ស្ថាប័នរបស់ពួកគេផងដែរ ៕