កាហ្សាក់ស្ថាន៖ កាលពីថ្ងៃអាទិត្យ ប្រជាជនជាច្រើនត្រូវបានគេឃើញឆ្លងកាត់ព្រំដែនប្រទេស ចូលប្រទេសរុស្ស៊ីពីប្រទេសកាហ្សាក់ស្ថាន បន្ទាប់ពីការតវ៉ារាលដាលនៅក្នុងប្រទេសអាស៊ីកណ្តាលមួយនេះ។ ក្រុមមន្ត្រីបាននិយាយថា ប្រជាជនជាង ១៦០នាក់បានស្លាប់ និងរាប់ពាន់នាក់ទៀតបានរងរបួសនៅក្នុងបាតុកម្មដែលបានវិវត្តទៅជាអំពើហិង្សា នៅក្នុងប្រទេសកាហ្សាក់ស្ថានកាលពីសប្តាហ៍កន្លងទៅនេះ។
ប្រធានាធិបតីកាហ្សាក់ស្ថានបានអនុញ្ញាតឱ្យកងកម្លាំងសន្តិសុខ បាញ់សម្លាប់អ្នកដែលចូលរួមក្នុងភាពវឹកវរ ខណៈដែលលោកបានអំពាវនាវឱ្យជួយពីសម្ព័ន្ធមិត្តយោធាដឹកនាំដោយប្រទេសរុស្ស៊ី ជាអង្គការសន្ធិសញ្ញាសន្តិសុខរួម។ សេវាអ៊ីនធឺណិត និងទូរសព្ទដៃត្រូវបានកាត់ផ្តាច់នៅក្នុងប្រទេសនេះ។ ប្រជាជនម្នាក់ដែលកំពុងឆ្លងកាត់ច្រកព្រំដែនចូលក្នុងប្រទេសរុស្សីបាននិយាយថា ស្ថានភាពនៅក្នុងប្រទេសកាហ្សាក់ស្ថានគួរឱ្យព្រួយបារម្ភ។ លោកនិយាយថា យើងបានចាប់ផ្តើមរស់នៅដូចនៅសតវត្សបុរាណ គ្មានអ្វីដំណើរការនោះទេ។
ការតវ៉ាជុំវិញការកើនឡើងខ្ពស់នៃតម្លៃប្រេងឥន្ធនៈ បានចាប់ផ្តើមនៅភាគខាងលិចរបស់ប្រទេសកាលពីថ្ងៃទី២ ខែមករា ហើយបានរាលដាលពេញប្រទេស ដែលជាក់ស្តែងបង្ហាញពីការមិនសប្បាយចិត្តលើតម្លៃប្រេងឥន្ធនៈឡើងថ្លៃខ្ពស់។ ការិយាល័យរបស់ប្រធានាធិបតីលោក Kassym-Jomart Tokayev បាននិយាយកាលពីថ្ងៃអាទិត្យថា សណ្តាប់ធ្នាប់មានស្ថិរភាពក្នុងប្រទេស ហើយអាជ្ញាធរបានគ្រប់គ្រងឡើងវិញនូវអគាររដ្ឋបាលដែលត្រូវបានកាន់កាប់ដោយក្រុមអ្នកតវ៉ា ដែលអគារមួយចំនួនត្រូវបានដុតបំផ្លាញ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
