គណៈកម្មាធិការស្វែងរកការពិតស៊ីរី និយាយនៅថ្ងៃអង្គារនេះថា មនុស្ស ១.៤២៦នាក់ រួមទាំងស្រ្តី ៩០នាក់ត្រូវបានសម្លាប់អំឡុងអំពើហិង្សាថ្ងៃទី ៦-៩ ខែមីនា នៅតំបន់ឆ្នេរប្រទេសមួយនេះ ដែលគេបានមើលឃើញការវាយប្រហារលើកងកម្លាំងសន្តិសុខ បន្ទាប់មកការសម្លាប់ក្រុមជនជាតិភាគតិច Alawite ។

ឧបទ្ទេវហេតុនេះ គឺជាអំពើហិង្សាដ៏អាក្រក់បំផុតកើតមាននៅប្រទេសស៊ីរី ចាប់តាំងពីការដួលរលំទៅរបស់របបលោកប្រធានាធិបតី Bashar al-Assad កាលពីឆ្នាំមុន ហើយការងាររបស់គណៈកម្មាធិការស្វែងរកការពិត ត្រូវបានគេមើលឃើញថាជាការធ្វើតេស្តដ៏សំខាន់មួយនៃថ្នាក់ដឹកនាំថ្មី បង្កើតឡើងដោយក្រុមឧទ្ទាមប្រឆាំងលោក Assad ។

នៅក្នុងការស្វែងរកឃើញសំខាន់ គណៈកម្មាធិការ បានធ្វើការសន្និដ្ឋានថា ក្រុមមេបញ្ជាការស៊ីរី ពុំបានបញ្ជាឲ្យប្រព្រឹត្តបទល្មើសនោះទេ ហើយការពិតមានតែបញ្ជាឲ្យបញ្ឈប់ពួកគេ ។

គណៈកម្មាធិការបានចងក្រងបញ្ជីឈ្មោះជនសង្ស័យ ២៩៨នាក់ដែលពាក់ព័ន្ធនឹងការព្រឹត្តបទល្មើសមកលើជនជាតិដើមភាគតិច Alawites ហើយជនសង្ស័យ ២៦៥នាក់ ពាក់ព័ន្ធនឹងការវាយប្រហារដំបូងមកលើកងកម្លាំងសន្តិសុខ ។

លោក Yasser Farhan គឺជាអ្នកនាំពាក្យគណៈកម្មាធិការស្វែងរកការពិតស៊ីរី និយាយថា ឈ្មោះរបស់ពួកគេ ពុំត្រូវបានបញ្ចេញជាសាធារណៈនោះទេមកទល់នឹងពេលនេះ ហើយត្រូវបានបញ្ជូនទៅកាន់តុលាការសម្រាប់ការស៊ើបអង្កេតបន្ថែមទៀត ខណៈមនុស្ស ៣១នាក់ ត្រូវបានចាប់ខ្លួន ៕