ក្រុមជំនួយ និងសិទ្ធិមនុស្សជាង១០០នៅថ្ងៃពុធ ២៣កក្កដានេះ បានអំពាវនាវឱ្យរដ្ឋាភិបាលចាត់វិធានការស្របពេលភាពអត់ឃ្លានរីករាលដាលនៅក្នុងតំបន់ហ្កាហ្សា រួមទាំងការទាមទារឱ្យមានបទឈប់បាញ់ជាបន្ទាន់ និងអចិន្ត្រៃយ៍ និងការដកការរឹតត្បិតទាំងអស់លើលំហូរជំនួយមនុស្សធម៌។ 

ក្នុងសេចក្តីថ្លែងការណ៍មួយដែលបានចុះហត្ថលេខាដោយអង្គការចំនួន ១១១ រួមទាំង ក្រុមមនុស្សធម៌សកល Mercy Corps ក្រុមប្រឹក្សាជនភៀសខ្លួនន័រវេស និងភ្នាក់ងារជនភៀសខ្លួនអន្តរជាតិ បានព្រមានថា ភាពអត់ឃ្លានដ៏ធ្ងន់ធ្ងរកំពុងរីករាលដាលពាសពេញតំបន់នេះ សូម្បីតែអាហារ ទឹកស្អាត ការផ្គត់ផ្គង់វេជ្ជសាស្ត្រ និងសម្ភារៈផ្សេងៗជាច្រើនទៀត។   

ជាលើកដំបូងចាប់តាំងពីសង្គ្រាមនៅហ្កាហ្សាបានចាប់ផ្តើមកាលពីខែតុលាឆ្នាំ ២០២៣ ក្រុមមន្ត្រីប៉ាឡេស្ទីនបាននិយាយថាមនុស្សរាប់សិបនាក់បានស្លាប់ដោយសារភាពអត់ឃ្លាន។

យោងតាមក្រុមមន្ត្រីខាងលើមនុស្សយ៉ាងហោចណាស់១០១នាក់ត្រូវបានគេដឹងថាបានស្លាប់ដោយសារកង្វះអាហារូបត្ថម្ភក្នុងអំឡុងពេលជម្លោះ ក្នុងនោះមានកុមារចំនួន ៨០ នាក់ ដែលភាគច្រើននៃពួកគេនៅក្នុងប៉ុន្មានសប្តាហ៍ថ្មីៗនេះ ។

អគ្គលេខាធិការអង្គការសហប្រជាជាតិ លោក Antonio Guterres បាននិយាយថា កង្វះអាហារូបត្ថម្ភកំពុងកើនឡើង ហើយភាពអត់ឃ្លានកំពុងលេចឡើងគ្រប់កន្លែងក្នុងដែនដីហ្កាហ្សា ដោយហៅស្ថានភាពនេះថាជារូបភាពដ៏រន្ធត់។

អ៊ីស្រាអែលបង្កើនការវាយលុកនៅតំបន់ហ្កាហ្សា ទន្ទឹមនឹងអង្គការសហប្រជាជាតិ និយាយថា ឥឡូវនេះជិត៩០%នៃប្រជាពលរដ្ឋក្នុងដែនដីនេះ ស្ថិតនៅក្រោមការបញ្ជាឱ្យជម្លៀស ឬនៅក្នុងតំបន់យោធាអ៊ីស្រាអែល ហើយអង្គការសុខភាពពិភពលោកបាននិយាយថាឃ្លាំងរបស់ខ្លួនត្រូវបានវាយប្រហារ៕