រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយកាលថ្ងៃអង្គារ (២២ កក្កដា) ថា ក្រុមមន្ត្រីសហរដ្ឋអាមេរិក និងប្រទេសចិន នឹងជួបប្រជុំគ្នានៅរដ្ឋធានីប្រទេសស៊ុយអែត នាសប្តាហ៍ក្រោយនេះ ដើម្បីពិភាក្សាពីការបន្ថែមពេលដល់ថ្ងៃកំណត់ពន្ធទី១២ ខែសីហា សម្រាប់កិច្ចចរចាកិច្ចព្រមព្រៀងពាណិជ្ជកម្ម ខណៈលោកប្រធានាធិបតី Donald Trump បានប្រកាសកិច្ចព្រមព្រៀងជាមួយហ្វីលីពីន និងបានបញ្ចេញលក្ខខណ្ឌនៃកិច្ចព្រមព្រៀងពីមុនជាមួយឥណ្ឌូនេស៊ី។

ថ្លែងក្នុងបទសម្ភាសន៍ជាមួយទូរទស្សន៍ Fox News លោក Bessent បានសម្ដែងសុទិដ្ឋិនិយមថា ពាណិជ្ជកម្មកំពុងស្ថិតក្នុងដំណាក់កាលដ៏ល្អជាមួយចិន ដោយបន្ថែមថា កិច្ចប្រជុំជាមួយសមភាគីចិន នឹងធ្វើឡើងនៅថ្ងៃចន្ទ និងថ្ងៃអង្គារសប្តាហ៍ក្រោយនេះ ជាមួយនឹងកិច្ចពិភាក្សាពីការធ្វើឱ្យមានតុល្យភាពឡើងវិញនូវទំនាក់ទំនងពាណិជ្ជកម្មរវាងអាមេរិក និងចិន។

អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោន និយាយថា ចិន និងអាមេរិក បានបញ្ចប់សេចក្តីលម្អិតនៃការអនុវត្តកិច្ចព្រមព្រៀងពាណិជ្ជកម្មដែលសម្រេចបានដោយលោក Trump និងលោកប្រធានាធិបតី Xi Jinping។ គួរឱ្យដឹងថា ចាប់តាំងពីពាក់កណ្តាលខែឧសភាមក លោក Bessent បានជួបមន្ត្រីជាន់ខ្ពស់ចិនពីរលើកមកហើយនៅទីក្រុងហ្សឺណែវ និងទីក្រុងឡុងដ្រ៍ ទាក់ទងនឹងកិច្ចព្រមព្រៀងពាណិជ្ជកម្មបណ្ដោះអាសន្ន ដោយកំណត់ពេល ៩០ថ្ងៃ ដើម្បីដោះស្រាយបញ្ហាកាន់តែស៊ីជម្រៅ។

ប្រសិនបើពុំមានកិច្ចព្រមព្រៀង ឬការចរចាបន្ថែមទៀតត្រឹមថ្ងៃផុតកំណត់នោះ របាំងពន្ធដែលភាគីទាំងពីរធ្លាប់ដាក់សងសឹកលើគ្នាទៅមកកាលពីមុនអាចនឹងត្រឡប់មកវិញ ដោយអាមេរិកមានពន្ធ ១៤៥% លើចិន ហើយចិនមានពន្ធ ១២៥% លើអាមេរិកវិញ។

បន្ទាប់ពីការប្រកាសផែនការជំនួបស៊ុយអែតនេះ លោក Trump ក៏បានប្រកាសអត្រាពន្ធថ្មី ១៩% សម្រាប់ទំនិញពីហ្វីលីពីន បន្ទាប់ពីដំណើរទស្សនកិច្ចទៅកាន់សេតវិមានដោយប្រធានាធិបតីហ្វីលីពីន ខណៈលោក Trump និយាយថា ទីក្រុងម៉ានីលនឹងមិនយកពន្ធលើទំនិញរបស់អាមេរិកឡើយ៕