យោងតាមអង្គការសហប្រជាជាតិបានឱ្យដឹងថា កងកម្លាំងអ៊ីស្រាអែល បានសម្លាប់ជនជាតិប៉ាឡេស្ទីនជាង ១.០០០នាក់ ក្នុងពេលពួកគេកំពុងព្យាយាមស្វែងរកស្បៀងអាហារក្នុងតំបន់ហ្កាហ្សា ចាប់តាំងពីមូលនិធិមនុស្សធម៌ហ្កាហ្សា (GHF) ដែលគាំទ្រដោយសហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការនៅចុងខែឧសភាមក។

អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ លោក Thameen Al-Kheetan បានប្រាប់ទីភ្នាក់ងារព័ត៌មាន AFP កាលពីថ្ងៃអង្គារ (២២ កក្កដា) ថា គិតត្រឹមថ្ងៃទី២១ ខែកក្កដា ឆ្នាំ២០២៥នេះ ក្រុមការងារអង្គការសហប្រជាជាតិបានកត់ត្រាអ្នកស្លាប់ក្នុងពេលស្វែងរកស្បៀងអាហារចម្អែតក្រពះចំនួន ១.០៥៤នាក់ នៅដែនដីហ្កាហ្សា ដោយមនុស្ស ៧៦៦នាក់ក្នុងចំណោមនោះ ត្រូវសម្លាប់នៅជុំវិញទីតាំងមូលនិធិ GHF និង ២៨៨នាក់ទៀតស្លាប់នៅក្បែរក្បួនជំនួយរបស់អង្គការសហប្រជាជាតិ និងអង្គការមនុស្សធម៌ផ្សេងទៀត។

នៅថ្ងៃអង្គារដដែលនេះ ក្រសួងសុខាភិបាលហ្កាហ្សា និយាយថា សង្រ្គាមឥតឈប់ឈររបស់អ៊ីស្រាអែលលើហ្កាហ្សា និងការបិទផ្លូវមនុស្សធម៌ ដែលខ្លួនដកចេញតែផ្នែកខ្លះប៉ុណ្ណោះក្នុងខែមីនា បន្តធ្វើឱ្យទឹកដីប៉ាឡេស្ទីនមួយនេះធ្លាក់ចូលទៅក្នុងវិបត្តិកង្វះអាហារូបត្ថម្ភកាន់តែខ្លាំងឡើង ដោយមនុស្សរាប់សិបនាក់ រួមទាំងកុមារ បានស្លាប់ដោយសារតែភាពអត់ឃ្លានធ្ងន់ធ្ងរ។

ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន UNRWA បាននិយាយថា កុមារជាង ១លាននាក់នៅហ្កាហ្សា កំពុងស្រេកឃ្លាន។ នាយកផ្នែកមនុស្សធម៌របស់អង្គការសង្រ្គោះកុមារ Save the Children បានពណ៌នាស្ថានភាពនៅហ្កាហ្សាថាជា "មហន្តរាយ" ដ៏អាក្រក់៕