ប្រធានាធិបតីអាមេរិកបច្ចុប្បន្ន លោក Donald Trump បានចោទប្រកាន់យ៉ាងធ្ងន់ធ្ងរលើលោកអតីតប្រធានាធិបតី Barack Obama ថា "ក្បត់ជាតិ" កាលពីថ្ងៃអង្គារ (២២ កក្កដា) ដោយមិនផ្តល់ភស្តុតាងអ្វីទេទៅលើការលើកឡើងថា លោក Obama បានដឹកនាំកិច្ចប្រឹងប្រែងស៊ើបអង្កេតដើម្បីចងភ្ជាប់លោក Trump ទៅនឹងរុស្ស៊ី យ៉ាងខុសខ្គង និងធ្វើឱ្យខូចដល់យុទ្ធនាការប្រធានាធិបតីឆ្នាំ២០១៦ របស់លោក។

អ្នកនាំពាក្យរបស់លោក Obama បានរិះគន់ខ្លាំងៗលើការអះអាងរបស់លោក Trump ដោយនិយាយថា "ការចោទប្រកាន់ខុសទំនងទាំងនេះគួរឱ្យអស់សំណើច និងជាការប៉ុនប៉ងរំខានដ៏ទន់ខ្សោយបំផុត"។

គួរឱ្យដឹងថា លោក Trump តែងវាយប្រហារពាក្យសម្ដីជាញឹកញយបែបប្រយោលលើលោក Obama ប៉ុន្តែការចង្អុលមុខចំៗលើបទព្រហ្មទណ្ឌបែបនេះគឺមិនដែលកើតឡើងទេតាំងពីប្រធានាធិបតីមកពីបក្សសាធារណរដ្ឋរូបនេះវិលត្រឡប់មកកាន់តំណែងអាណត្តិទីពីរក្នុងខែមករាមក ។

អំឡុងសុន្ទរកថានៅការិយាល័យ Oval Office លោក Trump បានលើកយកការអត្ថាធិប្បាយពីប្រធានចារកម្មសម្ងាត់ លោកស្រី Tulsi Gabbard ដែលក្នុងនោះលោកស្រីបានគំរាមបញ្ជូនមន្ត្រីរដ្ឋបាលលោក Obama ទៅក្រសួងយុត្តិធម៌ដើម្បីកាត់ទោស ជុំវិញការវាយតម្លៃចារកម្មនៃការជ្រៀតជ្រែករបស់រុស្ស៊ីក្នុងការបោះឆ្នោតឆ្នាំ២០១៦។ លោកស្រីបើកបង្ហាញឯកសារទាំងនោះ ហើយនិយាយថា ព័ត៌មានដែលលោកស្រីកំពុងបញ្ចេញនេះ បង្ហាញពី "ការរួមគំនិតក្បត់ជាតិ" ក្នុងឆ្នាំ២០១៦ ដោយមន្ត្រីរដ្ឋបាលជាន់ខ្ពស់របស់លោក Obama ដែលមកពីបក្សប្រជាធិបតេយ្យ ដើម្បីបង្ខូចលោក Trump នៅក្នុងការអះអាងដែលបក្សប្រជាធិបតេយ្យបានហៅថាជារឿងមិនពិតទាល់តែសោះ និងមានហេតុផលនយោបាយ។

ដោយនិយាយសំដៅលើឯកសារពាក់ព័ន្ធលោក Obama នោះ លោក Trump បានលើកឡើងកាលពីថ្ងៃអង្គារថា "លោកមានកំហុស ហើយគឺជាការក្បត់ជាតិ" ប៉ុន្តែលោកមិនបានផ្តល់ភស្តុតាងនៃការអះអាងដ៏ធ្ងន់ធ្ងរនេះទេ៕