កងកម្លាំងស្វ័យការពារដែនអាកាសរបស់ប្រទេសជប៉ុន កំពុងចូលរួមក្នុងសមយុទ្ធដឹកនាំដោយសហរដ្ឋអាមេរិក មានឈ្មោះថា Resolute Force Pacific ជាលើកដំបូងក្នុងពេលមានការកើនឡើងសកម្មភាពរបស់ប្រទេសចិននៅក្នុងតំបន់ឥណ្ឌូ-ប៉ាស៊ីហ្វិក។ កងទ័ពអាកាសសហរដ្ឋអាមេរិក កំពុងធ្វើសមយុទ្ធជាមួយប្រទេសជាច្រើន ចាប់តាំងពីថ្ងៃទី១០ ខែកក្កដា ដល់ថ្ងៃទី៨ ខែសីហានៅក្នុងតំបន់ប៉ាស៊ីហ្វិក។

កាលពីថ្ងៃអង្គារ ផ្នែកមួយចំនួននៃសមយុទ្ធត្រូវបានបើកទៅកាន់ប្រព័ន្ធផ្សព្វផ្សាយជប៉ុននៅឯមូលដ្ឋានទ័ពអាកាស Yokota របស់យោធាអាមេរិកក្នុងទីក្រុងតូក្យូ។ យន្តហោះដឹកជញ្ជូន C-130 បានហោះឡើងជាផ្នែកនៃសមយុទ្ធក្នុងគោលបំណងពង្រឹងសមត្ថភាពដាក់ពង្រាយជួរមុខរបស់យោធាអាមេរិក។

មេបញ្ជាការកងកម្លាំងអាមេរិកប្រចាំប្រទេសជប៉ុន ឧត្តមសេនីយ៍ឯក Stephen Jost បានសង្កត់ធ្ងន់លើសារៈសំខាន់នៃសមយុទ្ធដែលសហរដ្ឋអាមេរិក និងប្រទេសជប៉ុន បានធ្វើការរួមគ្នា។

លោកបានបញ្ជាក់អំពីតម្រូវការសម្រាប់ «សម្ព័ន្ធភាពរឹងមាំ» ដើម្បីឆ្លើយតបដោយប្រសិទ្ធភាពនូវ «បញ្ហាសន្តិសុខដ៏ស្មុគស្មាញ» ដែលតំបន់ឥណ្ឌូ-ប៉ាស៊ីហ្វិក ប្រឈមមុខ។ កាលពីខែមុន នាវាផ្ទុកយន្តហោះរបស់ប្រទេសចិនចំនួនពីរគ្រឿង នាវា Liaoning និងនាវា Shandong ត្រូវបានគេប្រទះឃើញនៅប៉ាស៊ីហ្វិក។

នៅពេលនោះ យន្តហោះចម្បាំងមួយគ្រឿងមកពីនាវា Shandong បានហោះកៀកនឹងយន្តហោះល្បាតរបស់កងកម្លាំងស្វ័យការពារដែនសមុទ្ររបស់ប្រទេសជប៉ុន ដែលបណ្តាលឱ្យក្រសួងការពារជាតិបង្ហាញការព្រួយបារម្ភយ៉ាងខ្លាំងចំពោះទីក្រុងប៉េកាំង។