ប្រព័ន្ធផ្សព្វផ្សាយក្នុងតំបន់ បានរាយការណ៍ថា អ៊ីរ៉ង់បាននិយាយកាលពីអង្គារថា អ្នកទោសចំនួន ២៧ នាក់ នៅមិនទាន់ចាប់បាននៅឡើយ បន្ទាប់ពីការវាយប្រហារតាមអាកាសរបស់អ៊ីស្រាអែល កាលពីខែមុន បានកំណត់គោលដៅទៅលើពន្ធនាគារ Evin នៅភាគខាងជើងនៃរដ្ឋធានីតេអេរ៉ង់។

ការវាយប្រហារតាមអាកាស គឺជាផ្នែកមួយនៃការវាយប្រហាររយៈពេល ១២ថ្ងៃ របស់អ៊ីស្រាអែល ទៅលើអ៊ីរ៉ង់ ដែលបានបណ្តាលឲ្យមនុស្សប្រហែល ១.១០០នាក់ ស្លាប់ ខណៈដែលមនុស្ស ២៨នាក់ បានស្លាប់ នៅក្នុងប្រទេសអ៊ីស្រាអែល នៅក្នុងការវាយប្រហារសងសឹករបស់អ៊ីរ៉ង់។

គេហទំព័រព័ត៌មាន Mizanonline របស់តុលាការ បានដកស្រង់សម្តីអ្នកនាំពាក្យលោក Asghar Jahangir ដែលបាននិយាយថា អ្នកទោសចំនួន ៧៥នាក់ បានរត់គេចខ្លួន បន្ទាប់ពីការវាយប្រហារ ដែលក្នុងនោះ ៤៨នាក់ ត្រូវបានចាប់ខ្លួនមកវិញ ឬវិលត្រឡប់មកវិញដោយស្ម័គ្រចិត្ត។ លោកបានបញ្ជាក់ថា អាជ្ញាធរនឹងចាប់ខ្លួនអ្នកផ្សេងទៀត ប្រសិនបើពួកគេ មិនប្រគល់ខ្លួនឲ្យនោះ។

លោក Jahangir បានបន្ថែមថា អ្នករត់គេចខ្លួន គឺជាអ្នកទោសដែលកំពុងអនុវត្តទោសសម្រាប់បទល្មើសតូចតាច។

មន្ត្រីអ៊ីរ៉ង់បាននិយាយថា ការវាយប្រហាររបស់អ៊ីស្រាអែល បានសម្លាប់មនុស្ស ៧១នាក់ ប៉ុន្តែប្រព័ន្ធផ្សព្វផ្សាយក្នុងស្រុក បានរាយការណ៍កាលពីដើមខែកក្កដាថា មនុស្ស ៨០នាក់ បានស្លាប់ នៅពេលនោះ ដោយក្នុងនោះមានបុគ្គលិកពន្ធនាគារ ទាហាន អ្នកទោស និងសមាជិកគ្រួសារដែលមកសួរសុខទុក្ខ។ អាជ្ញាធរ ក៏បាននិយាយថា អ្នកទោស ៥នាក់ បានស្លាប់។