ប្រធានាធិបតីអ៊ីរ៉ង់លោក Masoud Pezeshkian បានប្រាប់ទូរទស្សន៍ Al Jazeera ក្នុងបទសម្ភាសន៍មួយថា អ៊ីរ៉ង់មិនស្វែងរកការទទួលបានអាវុធនុយក្លេអ៊ែរនោះទេ ប៉ុន្តែនឹងបន្តចម្រាញ់សារធាតុអ៊ុយរ៉ានីញ៉ូម ស្របតាមបទដ្ឋាននៃច្បាប់អន្តរជាតិ។

លោកបាននិយាយថា៖«យើងច្រានចោលទាំងស្រុងនូវ [គំនិត]នៃការមានអាវុធនុយក្លេអ៊ែរ។ នេះគឺជាទិដ្ឋភាពនយោបាយ សាសនា មនុស្សធម៌ និងយុទ្ធសាស្ត្ររបស់យើង» ដោយបានបន្ថែមថា៖«អ៊ីរ៉ង់នឹងបន្តការចម្រាញ់សារធាតុអ៊ុយរ៉ានីញ៉ូមនៅលើទឹកដីរបស់ខ្លួន ស្របតាមច្បាប់អន្តរជាតិ នាពេលអនាគត»។

ដោយបានអត្ថាធិប្បាយអំពីការអះអាងរបស់ប្រធានាធិបតីអាមេរិកលោក ដូណាល់ ត្រាំ (Donald Trump) ដែលថា អ៊ីរ៉ង់មិនត្រូវទទួលបានអាវុធនុយក្លេអ៊ែរនោះទេ លោក Pezeshkian បាននិយាយថាខ្លួន«យល់ស្របនឹងការអះអាងនោះ»។

លោកបានបន្តថា៖«ការអះអាងថាកម្មវិធីនុយក្លេអ៊ែររបស់យើង ត្រូវបានលុបចោល គឺជាការបោកប្រាស់មួយ ពីព្រោះឱកាសរបស់យើង គឺស្ថិតនៅក្នុងគំនិតរបស់អ្នកវិទ្យាសាស្ត្ររបស់យើង មិនមែនស្ថិតនៅក្នុងរោងចក្រមនុយក្លេអ៊ែរទេ»។

នៅក្នុងបរិបទនេះ លោកបានសង្កត់ធ្ងន់ថា រាល់កិច្ចពិភាក្សាស្តីពីកម្មវិធីនុយក្លេអ៊ែររបស់អ៊ីរ៉ង់ ចាំបាច់ត្រូវគិតគូរពីផលប្រយោជន៍របស់ភាគីទាំងអស់ ហើយការគំរាមកំហែងណាមួយប្រឆាំងនឹងអ៊ីរ៉ង់ គឺមិនអាចទទួលយកបានឡើយ។

កិច្ចចរចាចំនួន ៥ជុំ ត្រូវបានធ្វើឡើងរវាងអ៊ីរ៉ង់ និងសហរដ្ឋអាមេរិក ចាប់តាំងពីដើមឆ្នាំ ២០២៥ ប៉ុន្តែគ្មានលទ្ធផលណាមួយ ត្រូវបានសម្រេច ដោយសារតែការបើកប្រតិបត្តិការយោធារបស់អ៊ីស្រាអែលប្រឆាំងនឹងទីក្រុងតេអេរ៉ង់ ដោយសហរដ្ឋអាមេរិក បានធ្វើការវាយប្រហារតាមអាកាសទៅលើទីតាំងនុយក្លេអ៊ែរអ៊ីរ៉ង់។ ប្រទេសអឺរ៉ុបទាំងបី គឺចក្រភពអង់គ្លេស បារាំង និងអាល្លឺម៉ង់ ដែលបានពិភាក្សាជាមួយទីក្រុងតេអេរ៉ង់ បានបរាជ័យ ក្នុងការសម្របសម្រួលកិច្ចព្រមព្រៀងនុយក្លេអ៊ែរថ្មី។