អឺរ៉ុប៖ ប្រទេសជាច្រើននៅអឺរ៉ុប និងអូស្ត្រាលីបានឃើញពីស្ថានភាពឆ្លងវីរុស COVID-19 កាន់តែច្រើនឡើងៗភាគច្រើនដោយសារតែវីរុសបម្លែងខ្លួនថ្មី Omicron ដែលឆ្លងខ្ពស់។ ចក្រភពអង់គ្លេសបានរាយការណ៍ពីអ្នកស្លាប់ទាក់ទងនឹងវីរុសឆ្លងចំនួន ៩៧នាក់បន្ថែមទៀត ដែលនាំឱ្យចំនួនសរុបនៃអ្នកស្លាប់កើនឡើងដល់ ១៥០,១៥៤នាក់។
ប្រទេសនេះបានរាយការណ៍ពីករណីឆ្លងវីរុស COVID-19 សរុប ១៤.៤៧៥.១៩២ករណី។ យោងតាមព័ត៌មាន BBC បានឱ្យដឹងថា ចក្រភពអង់គ្លេសគឺជាប្រទេសទី៧ ដែលមានចំនួនអ្នកស្លាប់លើសពី ១៥០,០០០នាក់បន្ទាប់ពីសហរដ្ឋអាមេរិក ប្រេស៊ីល ឥណ្ឌា រុស្ស៊ី ម៉ិកស៊ិក និងប៉េរូ។ ការកើនឡើងករណីឆ្លងបានដាក់សម្ពាធខ្លាំងលើប្រព័ន្ធវេជ្ជសាស្ត្រ ខណៈដែលយោធាត្រូវបានអំពាវនាវឱ្យជួយដល់មន្ទីរពេទ្យដែលកំពុងជួបការលំបាក។ គ្រូពេទ្យយោធា និងបុគ្គលិកជំនួយប្រមាណ ១,៨០០នាក់កំពុងត្រូវបានដាក់ពង្រាយទូទាំងប្រទេស។ វីរុសបម្លែងខ្លួនថ្មី Omicron ទំនងជាមានរោគសញ្ញាស្រាល ប៉ុន្តែការចូលមន្ទីរពេទ្យបន្តកើនឡើង ខណៈចំនួនបុគ្គលិកពេទ្យធ្លាក់ខ្លួនឈឺកំពុងកើនឡើង ឬធ្វើចត្តាឡីស័ក។
នៅកន្លែងផ្សេងទៀតនៅទូទាំងទ្វីបអឺរ៉ុប វិធានការរឹតត្បិតបន្ថែមកំពុងចូលជាធរមានដោយសារករណីវីរុស COVID-19 បន្តកើនឡើងពាសពេញតំបន់។ កាលពីថ្ងៃសៅរ៍មនុស្សរាប់ពាន់នាក់ក្នុងប្រទេសបារាំង បានធ្វើបាតុកម្មដើម្បីតវ៉ាប្រឆាំងនឹងវិធានការរឹតត្បិតថ្មី។ បច្ចុប្បន្ននេះមានតែភស្តុតាងនៃការចាក់វ៉ាក់សាំងបង្ការប៉ុណ្ណោះ ដែលនឹងត្រូវបានអនុញ្ញាតឲ្យចូលទៅកាន់កន្លែងបដិសណ្ឋារកិច្ច និងការដឹកជញ្ជូនសាធារណៈ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
