ស្របពេលមានការព្រួយបារម្ភកាន់តែខ្លាំងឡើងៗ អំពីស្ថានភាពមនុស្សធម៌ នៅតំបន់ហ្កាហ្សា រដ្ឋមន្ត្រីការបរទេស លោក Gideon Sa'ar និយាយថា អំឡុងពេលជជែកតាមទូរសព្ទជាមួយប្រមុខគោលនយោបាយការបរទេសសហភាពអឺរ៉ុប (EU) គឺលោកស្រី Kaja Kallas លោកបានប្រាប់ថា គឺក្រុមហាម៉ាស មិនមែនអ៊ីស្រាអែលនោះឡើយ ដែលត្រូវទទួលខុសត្រូវចំពោះឧបទ្ទវហេតុមនុស្សស្លាប់ច្រើន នៅក្បែរកន្លែងចែកចាយជំនួយ ក្នុងតំបន់ហ្កាហ្សា។

ក្នុងព័ត៌មានបញ្ជាក់ពីការសន្ទនាតាមទូរសព្ទនេះ នៅលើបណ្ដាញសង្គម X លោក Sa'ar រៀបរាប់ថា លោកបានប្រាប់លោកស្រី Kallas ថា៖ «ក្រុមហាម៉ាសកំពុងធ្វើយុទ្ធនាការភូតកុហក ខណៈពេលដែលមានចេតនាបង្កើតឲ្យមានជម្លោះ រវាងប្រជាជនស៊ីវិល មជ្ឈមណ្ឌលចែកចាយជំនួយ និង IDF (កងកម្លាំងការពារជាតិអ៊ីស្រាអែល)»។

រដ្ឋមន្ត្រីការបរទេសរូបនេះ បានបញ្ជាក់ថា៖ «ក្រុមហាម៉ាសគឺជាអ្នកបាញ់ប្រហារជនស៊ីវិល និងធ្វើទារុណកម្មពួកគេនៅពេលពួកគេព្យាយាមប្រមូលជំនួយ»។

លោកបន្ថែមថា ខណៈពេលដែលអ៊ីស្រាអែលបានយល់ស្របលើសំណើដោះលែងចំណាប់ថ្នូរ និងបទឈប់បាញ់ចុងក្រោយបង្អស់ «ក្រុមហាម៉ាសកំពុងពន្យឺត និងបំផ្លាញការចរចា ស្របពេលដែលកំពុងបន្តឃុំខ្លួនចំណាប់ថ្នូររបស់យើងយ៉ាងឃោរឃៅ។ សហគមន៍អន្តរជាតិមិនត្រូវធ្លាក់ចូលទៅក្នុងអន្ទាក់របស់ក្រុមហាម៉ាសនោះឡើយ»។

គួរបញ្ជាក់ថា សហភាពអឺរ៉ុប និងអ៊ីស្រាអែលបានប្រកាសកាលពីដើមខែនេះថា ពួកគេបានឈានដល់ «ការយោគយល់គ្នា» ដើម្បីកែលម្អស្ថានភាពមនុស្សធម៌ នៅតំបន់ហ្កាហ្សា ទោះបីជាមន្ត្រីជាន់ខ្ពស់អ៊ីស្រាអែល ក្រោយមកបានសង្កត់ធ្ងន់ថា មិនមានកិច្ចព្រមព្រៀងផ្លូវការនោះទេ ហើយវិធានការរបស់អ៊ីស្រាអែលត្រូវបានកំណត់ដោយការសម្រេចរបស់គណៈរដ្ឋមន្ត្រី មិនមែនដោយការធានាពីខាងក្រៅនោះទេ៕