រដ្ឋាភិបាលស៊ីរី បានបើកការស៊ើបអង្កេតការល្មើសច្បាប់ដ៏គួរឲ្យភ្ញាក់ផ្អើលនៅទីក្រុង Sweida ក្រោយក្រុមប្រដាប់អាវុធត្រូវបានគេមើលឃើញបាញ់ប្រហាររថយន្តក្រុងជម្លៀសជនស៊ីវិលចេញពីទីក្រុងមួយនេះ កាលពីថ្ងៃអង្គារ ។ 

ស្របពេលដែលគេមិនទាន់ច្បាស់ថាតើ ក្រុមខ្មាន់កាំភ្លើងទាំងអស់នោះជានរណានោះ វាបានក្លាយជាការកើនឡើងភាពតានតឹងមួយទៀត នៅក្នុងអំពើហិង្សានិកាយសាសនានៅក្នុងប្រទេសស៊ីរី ។

ជនស៊ីវិលក្រុមកុលសម្ព័ន្ធ Bedouin រាប់រយនាក់ត្រូវបានជម្លៀសចេញពីទីក្រុង Sweida ដែលសម្បូរដោយជនជាតិភាគតិច Druze រស់នៅច្រើន និងជាផ្នែកមួយនៃបទឈប់បាញ់គាំទ្រដោយសហរដ្ឋអាមេរិក ក្នុងគោលបំណងបញ្ចប់ថ្ងៃនៃការបង្ហូរឈាមនៅភាគខាងត្បូងប្រទេសស៊ីរី ដែលបានសម្លាប់មនុស្សរាប់រយនាក់ ។

ថ្លែងទៅកាន់ទីភ្នាក់ងារព័ត៌មានរ៉យទ័រនៅសាលារៀនផ្តល់ជាទីជម្រកដល់ក្រុមកុលសម្ព័ន្ធ Bedouin នៅខេត្ត Daraa អ្នកស្រី Hussein Al-Ali មកពីទីក្រុង Sweida បានរៀបរាប់ពីការវាយប្រហារដោយក្រុមជីវពល Druze ។

អ្នកស្រីនិយាយថា ពួកគេបានសម្លាប់យុវជនរបស់ពួកយើង សាកសពរបស់ពួកគេត្រូវបានបោះចោលនៅលើដី ។ ពួកគេចាប់ផ្តើមបាញ់ប្រហារពួកយើងពីចម្ងាយ ១០០ម៉ែត្រ ពួកគេវាយប្រហារផ្ទះសម្បែងរបស់ពួកយើង ហើយនៅទីបញ្ចប់ពួកយើង បានរត់ភៀសខ្លួនទាំងការភ័យខ្លាច មនុស្សមួយចំនួន ត្រូវបានគេវាយប្រហារនៅលើដីផ្ទាល់ខ្លួនរបស់ពួកគេ ។

សូមបញ្ជាក់ថា បទឈប់បាញ់បានកើតមានឡើងកាលពីថ្ងៃអាទិត្យ ទី២០ ខែកក្កដាកន្លងទៅ ខណៈកងកម្លាំងសន្តិសុខរបស់ក្រសួងមហាផ្ទៃស៊ីរី ត្រូវបានដាក់ពង្រាយនៅជាយទីក្រុង Sweida។

រដ្ឋមន្ត្រីក្រសួងមហាផ្ទៃស៊ីរី លោក Anas Khattab បាននិយាយថា បទឈប់បាញ់នឹងអនុញ្ញាតឲ្យមានការដោះលែងចំណាប់ខ្មាំង និងអ្នកដែលត្រូវបានឃុំខ្លួនដោយភាគីទាំង ២ ។ 

ការប្រយុទ្ធគ្នាបានចាប់ផ្តើមកាលពីរយៈពេល ១សប្តាហ៍កន្លងទៅ ដោយក្រុមសកម្មប្រយុទ្ធជនជាតិភាគតិច Druze ដែលមិនទុកចិត្តលើរដ្ឋាភិបាលដឹកនាំដោយក្រុមអ៊ិស្លាម ប្រឆាំងក្រុមកុលសម្ព័ន្ធ Bedouin ។ ទីក្រុងដាម៉ាស បានបញ្ជូនកងទ័ពទៅបង្ក្រាបការប្រយុទ្ធគ្នានេះ ប៉ុន្តែពួកគេត្រូវបានធ្វើឲ្យធ្លាក់ចូលទៅក្នុងអំពើហិង្សា ហើយត្រូវបានចោទប្រកាន់ពីបទរំលោភបំពានប្រឆាំងនឹងក្រុមជនជាតិភាគតិច Druze ៕