ទីភ្នាក់ងារសារព័ត៌មានរុស្ស៊ី នៅថ្ងៃពុធ (ទី២៣ ខែកក្កដា) បានរាយការណ៍ថា អ្នកចរចារុស្ស៊ី កំពុងធ្វើដំណើរការទៅកាន់ប្រទេសទួរគី សម្រាប់កិច្ចចរចាសន្តិភាពជាលើកដំបូងជាមួយអ៊ុយក្រែន ក្នុងរយៈពេលជាង ៧សប្តាហ៍។

ទីភ្នាក់ងារសារព័ត៌មានរដ្ឋ TASS បានបញ្ជាក់ថា ការពិភាក្សានឹងធ្វើឡើងនាយប់ថ្ងៃពុធនេះ ក្នុងទីក្រុងអ៊ីស្តង់ប៊ុល។ មន្ត្រីជាន់ខ្ពស់អ៊ុយក្រែនម្នាក់ បានប្រាប់សារព័ត៌មាន AFP ថា គណៈប្រតិភូអ៊ុយក្រែន ក៏បានចេញទៅទួរគីហើយដែរ សម្រាប់កិច្ចចរចាជុំថ្មីជាមួយរុស្ស៊ី នាថ្ងៃពុធ។ មន្ត្រីរូបនេះ បាននិយាយក្នុងលក្ខខណ្ឌមិនបញ្ចេញឈ្មោះថា ក្រុមកំពុងនៅលើផ្លូវធ្វើដំណើរ។

ទិន្នន័យពីគេហទំព័រតាមដានជើងហោះហើរ Flightradar24 បានបង្ហាញថា យន្តហោះដែលជិះដោយប្រធានគណៈប្រតិភូរុស្ស៊ី គឺលោក Vladimir Medinsky ដើម្បីធ្វើដំណើរឲ្យទៅដល់មុនកិច្ចពិភាក្សា នៅទីក្រុងអ៊ីស្តង់ប៊ុលនេះ បានហោះឡើងចេញពីទីក្រុងមូស្គូហើយ។

គួរបញ្ជាក់ថា ភាគីជម្លោះទាំង២ បានធ្វើការចរចាគ្នា ២លើកមកហើយ នៅមុននេះ ក្នុងទីក្រុងអ៊ីស្តង់ប៊ុល ដោយលើកទី១ នៅថ្ងៃទី១៦ ខែឧសភា និងលើកទី២ នៅថ្ងៃទី ២ ខែមិថុនា ដែលជាលទ្ធផលនាំឲ្យមានការដោះដូរអ្នកទោសសង្គ្រាម ឬឈ្លើយសឹករាប់ពាន់នាក់ និងអដ្ឋិធាតុរបស់ទាហាន។ តែយ៉ាងណាក្ដី ប្រទេសទាំង២ មិនបានឈានដល់បទឈប់បាញ់ ឬដំណោះស្រាយណាមួយ ដើម្បីបញ្ចប់សង្គ្រាមជិត ៣ឆ្នាំកន្លះនេះទេ។

ប្រធានាធិបតីអាមេរិកលោក Donald Trump កាលពីសប្តាហ៍មុន បានគំរាមដាក់ទណ្ឌកម្មថ្មីយ៉ាងធ្ងន់ធ្ងរ លើរុស្ស៊ី និងបណ្ដាប្រទេសដែលទិញការនាំចេញរបស់ទីក្រុងមូស្គូ ប្រសិនបើកិច្ចព្រមព្រៀងសន្តិភាព មិនសម្រេចបានក្នុងរយៈពេល ៥០ថ្ងៃទេនោះ៕