ក្រសួងការបរទេសចិននិយាយនៅថ្ងៃពុធនេះថា ចិនតែងតេគាំទ្រការដោះស្រាយការខ្វែងគំនិតគ្នាលើបញ្ហាពាណិជ្ជកម្ម និងសេដ្ឋកិច្ច តាមរយៈកិច្ចសន្ទនា និងការពិគ្រោះយោបល់ស្មើភាពគ្នា ។

អ្នកនាំពាក្យក្រសួងការបរទេសចិនលោក Guo Jiakun បានធ្វើសេចក្តីអត្ថាធិប្បាយបែបនេះ ក្នុងសន្និសីទសារព័ត៌មាននៅទីក្រុងប៉េកាំង ជាការឆ្លើយតបនឹងសំនួរចំពោះកិច្ចព្រមព្រៀងពាណិជ្ជកម្មដែលត្រូវបានចុះហត្ថលេខារវាងសហរដ្ឋអាមេរិក និងជប៉ុន ។

ប្រធានាធិបតីសហរដ្ឋអាមេរិកលោក Donald Trump បានឈានដល់កិច្ចព្រមព្រៀងពាណិជ្ជកម្មជាមួយជប៉ុនដែលនឹងបន្ទាបពន្ធលើការនាំចូលរថយន្ត និងធ្វើឲ្យទីក្រុងតូក្យូរួចពីការទារពន្ធថ្មីលើទំនិញផ្សេងទៀត ជាការដោះដូរនឹងកញ្ចប់វិនិយោគទុន និងប្រាក់កម្ចីវិលត្រឡប់ឲ្យសហរដ្ឋអាមេរិក ៥៥០ពាន់លានដុល្លារ ។

វិស័យរថយន្តជប៉ុនដែលស្មើនឹងជាង ១ភាគ ៤នៃការនាំចេញទៅកាន់សហរដ្ឋអាមេរិករបស់ខ្លួននោះ នឹងមើលឃើញការកាត់បន្ថយពន្ធមានស្រាប់ ១៥ភាគរយ ពីការដំឡើងពន្ធ ២៧,៥ភាគរយលើកមុន ។ ពន្ធដែលនឹងចូលជាធរមានលើទំនិញផ្សេងទៀតរបស់ជប៉ុន ចាប់ពីថ្ងៃទី ១ ខែសីហាខាងមុខនេះតទៅ នឹងត្រូវកាត់បន្ថយមកនៅ ១៥ភាគរយ ពី ២៥ភាគរយផងដែរ ៕