នាយករដ្ឋមន្ត្រីប៉ូឡូញ លោក Donald Tusk បានដំឡើងរដ្ឋមន្ត្រីការបរទេស លោក Radoslaw Sikorski ឲ្យកាន់តំណែងឧបនាយករដ្ឋមន្ត្រី នៅថ្ងៃពុធ (ទី២៣ ខែកក្កដា) នេះ ដែលជាផ្នែកមួយនៃការរុះរើរដ្ឋាភិបាល ក្នុងគោលបំណងទប់ស្កាត់ការធ្លាក់ចុះនូវប្រជាប្រិយភាពរបស់ខ្លួន។

ជាមួយគ្នានេះ លោក Tusk បានឲ្យដឹងថា លោក Sikorski ក៏នឹងបន្តកាន់តំណែងជារដ្ឋមន្ត្រីការបរទេសផងដែរ ខណៈដែលរដ្ឋមន្ត្រីហិរញ្ញវត្ថុ លោក Andrzej Domanski នឹងក្លាយជារដ្ឋមន្ត្រីក្រសួងហិរញ្ញវត្ថុ និងសេដ្ឋកិច្ច ដោយមើលខុសត្រូវផ្នែកសេដ្ឋកិច្ចទាំងអស់ នៅក្នុងរដ្ឋាភិបាលកណ្ដាលនិយមគាំទ្រអឺរ៉ុប។

ចាប់តាំងពីអ្នកជាតិនិយម លោក Karol Nawrocki បានទទួលជ័យជម្នះលើសម្ព័ន្ធមិត្តសេរីនិយមរបស់លោក Tusk គឺលោក Rafal Trzaskowski ក្នុងការបោះឆ្នោតប្រធានាធិបតីខែមិថុនា ភាពតានតឹង នៅក្នុងក្រុមចម្រុះកំពុងកាន់អំណាច Civic Coalition បានកើនឡើង និងធ្វើឲ្យមានភាពមិនច្បាស់លាស់ អំពីអនាគតរបស់ក្រុមនេះ ក្រោមការគ្រប់គ្រងរបស់ប្រធានាធិបតីដែលមានអំណាចវេតូ។

រដ្ឋាភិបាលរបស់លោក Tusk បានធ្លាក់ចុះប្រជាប្រិយភាពជាលំដាប់ នៅក្នុងការស្ទង់មតិ ចាប់តាំងពីពាក់កណ្តាលឆ្នាំ២០២៤។ ការស្ទង់មតិចុងក្រោយរបស់អង្គភាព CBOS បានបង្ហាញថា ក្នុងខែនេះ ការគាំទ្រ ចំពោះគូប្រជែងរបស់រដ្ឋាភិបាល បានកើនឡើងដល់ ៤៨ភាគរយ ខណៈពេលដែលរដ្ឋាភិបាល បានបន្តទទួលបានកម្រិត ៣២ភាគរយដដែល៕