ប្រធានគណៈកម្មការអឺរ៉ុប លោកស្រី Ursula von der Leyen បានប្រាប់អ្នកសារព័ត៌មាន នៅទីក្រុងតូក្យូ នាថ្ងៃពុធ (ទី២៣ ខែកក្កដា) នេះថា សហភាពអឺរ៉ុប (EU) និងជប៉ុន នឹងធ្វើការកាន់តែជិតស្និទ្ធបន្ថែមទៀត ដើម្បីប្រឆាំងនឹងការសម្លុតកំហែងផ្នែកសេដ្ឋកិច្ច និងដោះស្រាយការអនុវត្តពាណិជ្ជកម្មមិនយុត្តិធម៌។

ការអត្ថាធិប្បាយរបស់លោកស្រី Von der Leyen បានធ្វើឡើងបន្ទាប់ពីមានកិច្ចប្រជុំកំពូល EU-Japan (សហភាពអឺរ៉ុប-ជប៉ុន) ជាមួយនាយករដ្ឋមន្ត្រីជប៉ុន លោក Shigeru Ishiba ខណៈដែល EU ប្រឹងប្រែងបញ្ចប់កិច្ចព្រមព្រៀងពាណិជ្ជកម្មជាមួយសហរដ្ឋអាមេរិក និងមួយថ្ងៃនៅមុនអ្វីដែលអាចជាកិច្ចប្រជុំដ៏តានតឹងជាមួយមេដឹកនាំចិន។

ប្រទេសជប៉ុនទើបបានឈានដល់កិច្ចព្រមព្រៀងពាណិជ្ជកម្មជាមួយសហរដ្ឋអាមេរិក កាលពីថ្ងៃអង្គារ (ទី២២ ខែកក្កដា) ដែលបានបន្ទាបអត្រាពន្ធលើការនាំចូលរថយន្ត ជាថ្នូរនឹងការវិនិយោគ និងផ្ដល់ប្រាក់កម្ចីដល់សហរដ្ឋអាមេរិក។

លោក Von der Leyen បានប្រាប់សារព័ត៌មានបន្ថែមថា EU និងជប៉ុន នឹងស្វែងរកការពង្រឹងសន្តិសុខសេដ្ឋកិច្ចជាមួយគ្នា។

ចំណែកលោក Ishiba បានប្រាប់អ្នកសារព័ត៌មានថា EU និងជប៉ុន នឹងធ្វើការ ដើម្បីបន្តរក្សា និងពង្រឹងសណ្តាប់ធ្នាប់សេដ្ឋកិច្ចសេរី និងយុត្តិធម៌ ដោយផ្អែកលើច្បាប់។ ជាមួយគ្នានេះ មេដឹកនាំជព៉ុនរូបនេះ បានបញ្ជាក់ថា EU និងជប៉ុនបានយល់ព្រមធ្វើការដើម្បីពង្រឹងឧស្សាហកម្មការពារជាតិ និងចាប់ផ្តើមកិច្ចពិភាក្សា សម្រាប់កិច្ចព្រមព្រៀងសន្តិសុខព័ត៌មាន៕