កម្មវិធីស្បៀងអាហារពិភពលោករបស់អង្គការសហប្រជាជាតិ(WFP) បានប្រកាសនៅថ្ងៃពុធនេះថា នៅដំណាច់ខែកក្កដានេះ ពួកគេនឹងបង្ខំចិត្តផ្អាកជំនួយស្បៀងអាហារ និងជំនួយអាហារូបត្ថម្ភដល់ពលរដ្ឋ ១,៣លាននាក់នៅតំបន់ភាគឦសាននីហ្សេរីយ៉ាដែលរងផលប៉ះពាល់ដោយសារក្រុមបះបោរ ដោយសារអស់ស្តុក ។

វិបត្តិនេះកើតចេញពីការខ្វះខាតថវិកាយ៉ាងធ្ងន់ធ្ងរដែលធ្វើឲ្យធ្ងន់ធ្ងរឡើងដោយសារការរុះរើទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ(USAID)របស់លោកប្រធានាធិបតី Donald Trump ដែលនាំឲ្យមានការកាត់ផ្តាច់ជំនួយមនុស្សធម៌សកល ។

ទីភ្នាក់ងារ USAID បានផ្តល់មូលនិធិ ៤៥ភាគរយនៃកម្មវិធី WFP សម្រាប់តំបន់ភាគឦសាននីហ្សេរីយ៉ាកាលពីឆ្នាំមុន ។

លោក Trust Mlambo គឺជាប្រធានកម្មវិធី WFP នៅទីក្រុង Maiduguri និយាយថា មកទល់នឹងពេលបច្ចុប្បន្ននេះ ឃ្លាំងជំនួយទាំងអស់របស់ WFP លែងសេសសល់អ្វីទៀតហើយ ។

លោកបន្តថា វាបានកើតមានឡើងនៅពេលវេលាលំបាក ដោយសារពួកយើងស្ថិតនៅកណ្តាលរដូវគ្មានផល ជាទីដែលអសន្តិសុខស្បៀងកាន់តែអាក្រក់ខ្លាំងបំផុត ហើយពួកយើងអស់មូលនិធិ ដើម្បីទ្រទ្រង់ប្រតិបត្តិការរបស់ពួកយើង ។

ស្តុកស្បៀងអាហារ និងស្តុកអាហារូបត្ថម្ភរបស់ WFP បានអស់ ក្រោយគ្រឿងផ្គត់ផ្គង់ចុងក្រោយគេនៅសល់ក្នុងឃ្លាំងកាលពីដើមខែកក្កដានេះ ក្នុងនោះជំនួយសង្រ្គោះអាយុជីវិត នឹងលែងមាននៅពេលដែលការចែកចាយបច្ចុប្បន្ន ត្រូវបានបញ្ចប់ ។

វិបត្តិមូលនិធិ ធ្វើឲ្យប៉ះពាល់ដល់គ្រួសារដូចជាអ្នកស្រី Yaanama Aji ដែលជាស្រ្តីមានកូន ៦នាក់ រត់ភៀសខ្លួនចេញពីភូមិរបស់គាត់ ក្រោយក្រុមប្រដាប់អាវុធវាយប្រហារ កាប់សម្លាប់ និងចាប់ជម្រិតមនុស្ស រួមទាំងចាប់កូនស្រីរបស់គាត់ផងដែរ ។ បច្ចុប្បន្ន អ្នកស្រីប្រឈមនឹងភាពស្រេកឃ្លានខ្លាំងបំផុតជាមួយមនុស្សរាប់លាននាក់ផ្សេងទៀត ។

សូមបញ្ជាក់ថា អំពើហិង្សានៅតំបន់ភាគឦសាននីហ្សេរីយ៉ា បានសម្លាប់មនុស្សរាប់ពាន់នាក់ និងមនុស្សយ៉ាងហោច ២លាននាក់ បានជម្លៀសខ្លួន ។ ដោយគ្មានមូលនិធិថ្មី កម្មវិធី WFPព្រមានថា ពលរដ្ឋងាយរងគ្រោះ នឹងបង្ខំចិត្តធ្វើចំណាកស្រុក ដើម្បីស្វែងរកស្បៀងអាហារ និងទីជម្រក ៕