ប្រមុខអង្គការសុខភាពពិភពលោក (WHO) បាននិយាយកាលពីថ្ងៃពុធទី ២៣ កក្កដាថា តំបន់ហ្កាហ្សាកំពុងប្រឈមភាពអត់ឃ្លានកាន់តែធ្ងន់ធ្ងរទូទាំងតំបន់ដែលបង្កើតឡើងដោយមនុស្ស ដោយសារ ការបិទផ្លូវរបស់អ៊ីស្រាអែលនៅតែបន្ត និងការរឹតបន្តឹងយ៉ាងខ្លាំងលើការផ្តល់ជំនួយមនុស្សធម៌។ 

លោក Tedros Adhanom Ghebreyesus ប្រមុខអង្គការសុខភាពពិភពលោកបាននិយាយក្នុងសន្និសីទសារព័ត៌មានតាមវីដេអូថា ច្បាស់ណាស់ថាភាពអត់ឃ្លានដ៏ធ្ងន់ធ្ងរនេះត្រូវបានបង្កើតឡើងដោយមនុស្ស ។នេះគឺដោយសារតែការរារាំងជំនួយមិនឲ្យចូល ។

ការអត្ថាធិប្បាយរបស់លោក បានធ្វើឡើងក្រោយការអំពាវនាវដោយភ្នាក់ងារជំនួយជាង១០០ ព្រមានអំពីវិបត្តិភាពអត់ឃ្លានកាន់តែខ្លាំងនៅក្នុងដែនដីហ្កាហ្សា ជាកន្លែងដែលអាហារ ទឹកស្អាត និងការផ្គត់ផ្គង់ផ្នែកវេជ្ជសាស្រ្តជាច្រើននៅតែជាប់គាំងនៅខាងក្រៅតំបន់រងការឡោមព័ទ្ធនោះ។

ទីភ្នាក់ងារជំនួយបាននិយាយថា ការផ្គត់ផ្គង់ស្បៀងអាហារនៅហ្កាហ្សាបានអស់ហើយ ចាប់តាំងពីអ៊ីស្រាអែលបានបិទផ្លូវទាំងស្រុងកាលពីខែមីនា ជាផ្នែកនៃសង្គ្រាមរបស់ខ្លួនប្រឆាំងនឹងក្រុមសកម្មប្រយុទ្ធប៉ាឡេស្ទីនហាម៉ាស។ ទោះការបិទផ្លូវត្រូវបានបន្ធូរបន្ថយកាលពីខែឧសភាក៏ដោយ អង្គការអន្តរជាតិនានានិយាយថា មានតែលំហូរនៃជំនួយមានកំណត់ប៉ុណ្ណោះដែលកំពុងទៅដល់ដៃប្រជាជនហ្កាហ្សាចំនួន ២,២លាននាក់។     

ក្រសួងសុខាភិបាលហ្កាហ្សាបាននិយាយកាលពីថ្ងៃពុធថាមនុស្ស ១០ នាក់ទៀតបានស្លាប់ក្នុងមួយយប់ព្រោះការអត់ឃ្លានដែលនាំឱ្យចំនួនសរុបកើនឡើងដល់ ១១១នាក់ ចាប់តាំងពីជម្លោះបានចាប់ផ្តើម ដែលភាគច្រើននៃអ្នកស្លាប់គឺក្នុងប៉ុន្មានសប្តាហ៍ថ្មីៗនេះ ខណៈភាពអត់ឃ្លានរីករាលដាលពាសពេញដែនដីហ្កាហ្សា៕