អ៊ុយក្រែន កាលពីថ្ងៃពុធទី២៣ ខែកក្កដា បានអំពាវនាវឱ្យមានការចរចាដោយផ្ទាល់រវាងប្រធានាធិបតី លោក Volodymyr Zelenskyy និងប្រធានាធិបតីរុស្ស៊ី លោក Vladimir Putin នៅចុងខែសីហា ទោះបីជារុស្ស៊ីបាននិយាយសម្រាលពីឱកាសនៃការទម្លាយភាពទាល់ច្រកក្នុងការចរចារជុំចុងក្រោយដែលបានធ្វើឡើងនៅក្នុងទីក្រុងអ៊ីស្តង់ប៊ុល ប្រទេសទួរគីក៏ដោយ។

ថ្លែងទៅកាន់អ្នកសារព័ត៌មានបន្ទាប់ពីការចរចា ប្រធានក្រុមអ្នកចរចារបស់អ៊ុយក្រែន លោក Rustem Umerov បាននិយាយថា ទីក្រុងគីវ បានស្នើឱ្យមានជំនួបកំពូលរបស់មេដឹកនាំពាក់ព័ន្ធនឹងប្រធានាធិបតីទាំងពីរ ព្រមទាំងប្រធានាធិបតីសហរដ្ឋអាមេរិក លោក Donald Trump និងប្រធានាធិបតីទួរគី លោក Recep Tayyip Erdogan ។ លោក Umerov បាននិយាយថា «អាទិភាពទីមួយ គឺត្រូវរៀបចំជំនួបមេដឹកនាំនៃប្រធានាធិបតី។

អ្នកចរចាឈានមុខរបស់រុស្ស៊ី លោក Vladimir Medinsky បាននិយាយថា ភាគីទាំងពីរបានពិភាក្សាគ្នាយ៉ាងយូរ ប៉ុន្តែនៅតែ នៅឆ្ងាយពីបញ្ហាសំខាន់ៗ។ លោកប្រាប់អ្នកសារព័ត៌មានថា «ជំហរនៅតែនៅឆ្ងាយខ្លាំង ប៉ុន្តែយើងព្រមព្រៀងបន្តការទាក់ទងគ្នា»។ លោក Medinsky បាននិយាយថា ភាគីទាំងពីរបានព្រមព្រៀងដោះដូរឈ្លើយសឹកសង្គ្រាមចំនួន១.២០០នាក់ ហើយរុស្ស៊ីប្រគល់សាកសពទាហានអ៊ុយក្រែន៣.០០០នាក់មកវិញ។ លោកក៏បានស្នើបទឈប់បាញ់បណ្តោះអាសន្នដែលមានរយៈពេលត្រឹមតែ២៤ទៅ៤៨ម៉ោង ដើម្បីអនុញ្ញាតឱ្យមានការទាញយកសាកសពទាហានដែលស្លាប់ និងសង្គ្រោះទាហានរងរបួស។ រដ្ឋមន្ត្រីការបរទេសទួរគី លោក Hakan Fidan ដែលបានបើកការចរចា បានជំរុញឱ្យគណៈប្រតិភូឈានទៅរកបទឈប់បាញ់។ លោកនិយាយថា «គោលបំណងរបស់យើងគឺត្រូវបញ្ចប់សង្រ្គាមបង្ហូរឈាមឱ្យបានឆាប់តាមដែលអាចធ្វើទៅបាន ដែលបានធ្វើឲ្យខាតបង់ច្រើន» ហើយ«គោលដៅចុងក្រោយគឺបទឈប់បាញ់ដែលនឹងត្រួសត្រាយផ្លូវទៅរកសន្តិភាព»។