ក្រសួងហិរញ្ញវត្ថុកូរ៉េខាងត្បូង បាននិយាយថានៅថ្ងៃព្រហស្បតិ៍ (២៤ កក្កដា) នេះថា កិច្ចពិភាក្សារវាងមន្ត្រីជាន់ខ្ពស់របស់កូរ៉េខាងត្បូង និងសហរដ្ឋអាមេរិក ដែលគ្រោងទុកនៅថ្ងៃសុក្រ ស្អែកនេះ ដើម្បីចរចាអំពីពន្ធគយរបស់លោកប្រធានាធិបតីអាមេរិក Donald Trump ត្រូវបានលើកទៅពេលក្រោយវិញ ដោយសារតែបញ្ហាកាលវិភាគរបស់រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent។

ក្រសួងបាននិយាយថា ភាគីទាំងពីរនឹងរៀបចំកិច្ចប្រជុំឡើងវិញរវាងលោក Bessent និងរដ្ឋមន្ត្រីហិរញ្ញវត្ថុកូរ៉េខាងត្បូង លោក Koo Yun-cheol ក៏ដូចជាប្រេសិតពាណិជ្ជកម្មជាន់ខ្ពស់នៃប្រទេសទាំងពីរឱ្យបានឆាប់តាមដែលអាចធ្វើទៅបាន។

មុនការលុបចោលនេះ លោក Koo គ្រោងឡើងយន្តហោះទៅកាន់ទីក្រុងវ៉ាស៊ីនតោន នៅថ្ងៃព្រហស្បតិ៍នេះ ដើម្បីចូលរួមកិច្ចប្រជុំនៅថ្ងៃសុក្រ ២៥ កក្កដា ក្នុងក្តីសង្ឃឹមថានឹងសម្រេចកិច្ចព្រមព្រៀងដែលនឹងធ្វើឱ្យសេដ្ឋកិច្ចធំបំផុតទី៤ របស់អាស៊ីមួយនេះ ត្រូវលុបចេញពីការដាក់ទណ្ឌកម្មពន្ធ ២៥% របស់លោក Trump ដែលត្រូវកំណត់ឱ្យចូលជាធរមាននៅថ្ងៃទី០១ សីហា។

សម្ពាធលើកូរ៉េខាងត្បូង បានកើនឡើងខ្លាំងក្នុងសប្តាហ៍នេះ បន្ទាប់ពីជប៉ុន បានចុះកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក នៅក្នុងអ្វីដែលលោក Trump បាននិយាយថានឹងមើលឃើញទីក្រុងតូក្យូ អនុញ្ញាតឱ្យមានលទ្ធភាពចូលទីផ្សារកាន់តែច្រើនសម្រាប់ផលិតផលអាមេរិក រួមទាំងរថយន្ត និងផលិតផលកសិកម្មមួយចំនួនផងដែរ៕