ក្រុមហាម៉ាស បានប្រកាសក្រោយពាក់កណ្ដាលអធ្រាត្រថ្ងៃព្រហស្បតិ៍សប្ដាហ៍នេះថា ខ្លួនបានដាក់ការឆ្លើយតបទៅនឹងសំណើកិច្ចព្រមព្រៀងបទឈប់បាញ់ចុងក្រោយនៅហ្កាហ្សា និងកិច្ចព្រមព្រៀងដោះលែងចំណាប់ខ្មាំង រួចហើយ បន្ទាប់ពីក្រុមអ្នកសម្របសម្រួលបានបដិសេធយ៉ាងខឹងសម្បារចំពោះការឆ្លើយតបកាលពីកន្លងទៅដែលបង្ហាញដោយក្រុមភេរវករកាលពីយប់ថ្ងៃអង្គារ។ 

មន្ត្រីអ៊ីស្រាអែលបាននិយាយដោយសុំមិនបញ្ចេញឈ្មោះថា ការឆ្លើយតនៅពីថ្ងៃព្រហស្បតិ៍នេះ គឺជាការកែប្រែបន្ទន់ជំហរនៃអ្វីដែលក្រុមហាម៉ាសបានដាក់កាលពីថ្ងៃអង្គារ ដោយបន្ថែមថាក្រុងហ្សេរុយសាឡឹម កំពុងស្ថិតក្នុងដំណើរការពិនិត្យឡើងវិញទាំងស្រុង។

យោងតាមប្រភពដែលពាក់ព័ន្ធកិច្ចពិភាក្សាបានប្រាប់សារព័ត៌មាន The Times of Israel កាលពីថ្ងៃពុធសប្ដាហ៍នេះ ថាសំណើមុនរបស់ក្រុមហាម៉ាស ត្រូវបានច្រានចោលភ្លាមៗដោយក្រុមអ្នកសម្របសម្រួលដែលបានពិនិត្យមើលការទាមទារថ្មីរបស់ខ្លួនថា "មិនអាចទទួលយកបាន" ។

ក្រុមអ្នកសម្របសម្រួលកាលពីសប្តាហ៍មុនមានសុទិដ្ឋិនិយមអំពីឱកាសនៃកិច្ចព្រមព្រៀងដែលជិតមកដល់បន្ទាប់ពីអ៊ីស្រាអែលបានទម្លាក់ការទាមទារជាច្រើនរបស់ខ្លួនទាក់ទងនឹងវិសាលភាពនៃវត្តមានកងទ័ពរបស់ខ្លួននៅហ្កាហ្សាក្នុងអំឡុងពេលបទឈប់បាញ់រយៈពេលពីរខែដែលកំពុងពិភាក្សា។

តាមអ្នកការទូតអារ៉ាប់ដែលដឹងការចរចា បាននិយាយកាលពីថ្ងៃពុធថា ការឆ្លើយតបដែលបានដាក់ជូនដោយក្រុមហាម៉ាសកាលពីយប់ថ្ងៃអង្គារបានទាមទារឱ្យអ៊ីស្រាអែលដកកម្លាំងបន្ថែមទៀតឆ្ពោះទៅកាន់ព្រំដែនហ្កាហ្សា ដោយបន្ថែមថាក្រុមនេះក៏បានដាក់សំណើវិសោធនកម្មទាក់ទងនឹងការធានាពីក្រុមអ្នកសម្របសម្រួលដើម្បីធ្វើឱ្យកាន់តែពិបាកសម្រាប់អ៊ីស្រាអែលក្នុងការបន្តសង្រ្គាមឡើងវិញបន្ទាប់ពីបទឈប់បាញ់រយៈពេល៦០ថ្ងៃ បញ្ចប់ប្រតិបត្តិការរបស់មូលនិធិមនុស្សធម៌ហ្កាហ្សា ដ៏ចម្រូងចម្រាស និងការបង្កើនចំនួនអ្នកទោសសន្តិសុខដែលនឹងត្រូវដោះលែងសម្រាប់ចំណាប់ខ្មាំងអ៊ីស្រាអែលម្នាក់ៗ៕