អ៊ីស្រាអែល និងអ៊ុយក្រែន កាលពីថ្ងៃពុធ ទី២៣ ខែកក្កដា បានប្រកាសថា ពួកគេនឹងចាប់ផ្តើមកិច្ចពិភាក្សាជាផ្លូវការ ស្តីពីការប្រឆាំងទៅនឹងអ្វីដែលប្រទេសទាំងពីបានពិពណ៌នាថាជាការគំរាមកំហែងកាន់តែខ្លាំងឡើង បង្កឡើងដោយអ៊ីរ៉ង់ ជាសញ្ញាបង្ហាញពីទំនាក់ទំនងកាន់តែជិតស្និទ្ធរវាងអ៊ីស្រាអែល និងអ៊ុយក្រែន ក្នុងពេលមានការព្រួយបារម្ភផ្នែកសន្តិសុខរួមគ្នា។

ថ្លែងនៅក្នុងសន្និសីទសារព័ត៌មានរួមនៅក្នុងទីក្រុងគីវ រដ្ឋមន្ត្រីការបរទេសអ៊ុយក្រែន លោក Andriy Sybiga បាននិយាយថា ប្រទេសទាំងពីរបានសម្រេចចាប់ផ្តើម «ការសន្ទនាដាច់ដោយឡែកស្តីពីការគំរាមកំហែងរបស់អ៊ីរ៉ង់»។ លោក Sybiga និយាយថា «ប្រទេសរបស់យើង ប្រឈមបញ្ហាសន្តិសុខរួម» ដោយចាត់ទុកអ៊ីរ៉ង់ថាជា «ការគំរាមកំហែងដែលមានស្រាប់» ចំពោះស្ថិរភាពពិភពលោក។

អ៊ីស្រាអែល បានចោទអ៊ីរ៉ង់ជាយូរមកហើយពីការព្យាយាមផលិតអាវុធនុយក្លេអែរ ជាការចោទប្រកាន់ដែលក្រុងតេអេរ៉ង់ បានច្រានចោល។ ទន្ទឹមនឹងនេះ អ៊ុយក្រែន តែងតែត្រូវបានកំណត់គោលដៅជាញឹកញាប់ដោយយានដ្រូនផលិតនៅអ៊ីរ៉ង់ ដែលត្រូវបានប្រើប្រាស់ដោយកងកម្លាំងរុស្ស៊ី ក្នុងសង្គ្រាមដែលកំពុងបន្ត។ រដ្ឋមន្ត្រីការបរទេសអ៊ីស្រាអែល លោក Gideon Saar ជាមន្ត្រីជាន់ខ្ពស់របស់អ៊ីស្រាអែល ដែលបានមកធ្វើទស្សនកិច្ចនៅអ៊ុយក្រែន បាននិយាយថា វិធានការណាមួយ ដើម្បីដាក់កម្រិតការទទួលបានសព្វាវុធនិងបច្ចេកវិទ្យាពីទីក្រុងតេអេរ៉ង់ នឹងផ្តល់ផលប្រយោជន៍ដល់សន្តិសុខអឺរ៉ុបនិងអ៊ុយក្រែន។ លោក Saar និយាយថា «ខ្ញុំអរគុណដល់ប្រធានាធិបតី លោក Volodymyr Zelensky និងរដ្ឋាភិបាលអ៊ុយក្រែនសម្រាប់ជំហររបស់ខ្លួនដែលថា អ៊ីរ៉ង់មិនត្រូវមានអាវុធនុយក្លេអ៊ែរទេ» ។

កន្លងមក ទីក្រុងគីវ ធ្លាប់បានសម្តែងការខកចិត្តចំពោះជំហរអព្យាក្រឹតរបស់អ៊ីស្រាអែល លើការឈ្លានពានរបស់រុស្ស៊ី ប៉ុន្តែរដ្ឋាភិបាលទាំងពីរចែករំលែកមូលដ្ឋានរួមគ្នាលើទំនាក់ទំនងយោធារបស់អ៊ីរ៉ង់ជាមួយទីក្រុងមូស្គូ។ អ៊ុយក្រែន បានចោទអ៊ីរ៉ង់ដដែលៗពីការផ្គត់ផ្គង់អាវុធដល់ប្រទេសរុស្ស៊ី។