ប្រធានគណៈកម្មការសហភាពអឺរ៉ុប លោកស្រី Ursula von der Leyen បាននិយាយថា កិច្ចប្រជុំកំពូល ប្លុកអឺរ៉ុប-ចិន នៅថ្ងៃព្រហស្បតិ៍ ២៤ កក្កដា នេះ ជាឱកាសដ៏សំខាន់មួយដើម្បី "ឈានទៅមុខ និងធ្វើឱ្យទំនាក់ទំនងរបស់ភាគីទាំងពីរមានតុល្យភាពឡើងវិញ" ប៉ុន្មានម៉ោងប៉ុណ្ណោះមុនកិច្ចពិភាក្សាជាមួយមេដឹកនាំចិន នៅទីក្រុងប៉េកាំង។

លោកស្រី Von der Leyen និងប្រធានក្រុមប្រឹក្សាអឺរ៉ុប លោក Antonio Costa នឹងលើកឡើងពីបញ្ហាខ្ទាស់សំខាន់ៗជាច្រើនដូចជា អតុល្យភាពពាណិជ្ជកម្ម រ៉ែកម្រ និងរឿងអ៊ុយក្រែន ក្នុងអំឡុងកិច្ចប្រជុំជាមួយលោកប្រធានាធិបតីចិន Xi Jinping និងលោកនាយករដ្ឋមន្ត្រី Li Qiang។

លោកស្រី von der Leyen បានបង្ហោះលើបណ្ដាញសង្គម X នៅថ្ងៃព្រហស្បតិ៍នេះថា "អឺរ៉ុបជឿជាក់ថាអាចមានកិច្ចសហប្រតិបត្តិការដែលមានផលប្រយោជន៍ទៅមក" ដោយបង្ហាញពីជំហរផ្សះផ្សាកាន់តែខ្លាំង បន្ទាប់ពីប៉ុន្មានសប្តាហ៍មុនពេលជំនួបកំពូលនេះត្រូវគ្របដណ្ដប់ដោយជម្លោះណិជ្ជកម្មសងសឹកទៅមក និងវោហាសាស្ត្រយ៉ាងកម្រោលពីក្រុមមន្ត្រីអឺរ៉ុប។

ទីភ្នាក់ងារព័ត៌មានរដ្ឋស៊ីនហួរបស់ចិន ក៏បាននិយាយសម្រាលទៅកាន់ប្លុកដែលមានសមាជិក ២៧ប្រទេសនេះផងដែរ នៅក្នុងសេចក្ដីអត្ថាធិប្បាយពេលព្រឹកមួយ ដោយសង្កត់ធ្ងន់ថា ប្រទេសចិនគឺជា "ដៃគូដ៏សំខាន់" សម្រាប់អឺរ៉ុប ដែលមានផលប្រយោជន៍រួមជាច្រើនរវាងគ្នា។

នៅពេលដែលជំនួបកំពូលមកដល់ បញ្ហាផ្សេងទៀត រួមទាំងរថយន្តអគ្គិសនី លទ្ធភាពចូលទៅកាន់ទីផ្សារ និងការលើសចំណុះនៃឧស្សាហកម្មរបស់ចិន ក៏នឹងត្រូវបានលើកឡើងដោយមេដឹកនាំអឺរ៉ុប នៅក្នុងកិច្ចប្រជុំដែលប្រារព្ធខួបលើកទី៥០ នៃទំនាក់ទំនងការទូតរវាង ប្លុកអឺរ៉ុបនិងចិនមួយនេះ៕