​ភ្នំពេញ៖ ក្រុមហ៊ុន Cambodia Airport Investment (CAIC) បាន​បន្ត​បោះផ្សាយ​លក់​មូល​ប​ត្រ​បំណុល​ជា​លក្ខណៈ​បុគ្គល​មាន​ធានា​ក្នុង​ទំហំ​ទឹកប្រាក់​៣០​លាន​ដុល្លារ​អា​មេ​រិក លក់​អោយទៅ​ធនាគារ​អេស៊ីលីដា ដែល​ពិធី​ចុះហត្ថលេខា​កិច្ចព្រមព្រៀង​ទិញ​លក់​មូល​ប​ត្រ​បំណុល​នេះ​បានធ្វើ​ឡើង ភាគី​ក្រុមហ៊ុន​CAIC តំណាង​ដោយ លោក ឆា​រស៍ វ៉ាន់ Charles Vann ជា​អគ្គនាយករង និង​ភាគី​ធនាគារ​អេស៊ីលីដា ភីអិលស៊ី តំណាង​ដោយ បណ្ឌិត អ៊ិន ចាន់នី ជា​ប្រធាន​នាយក​ប្រតិបត្តិ ក្រោម​វត្តមាន​ចូលរួម​អ្នកឧកញ៉ា​បណ្ឌិត ពុង ឃាវ​សែ ប្រធាន​ប្រឹក្សា​ភិ​បាល​OCIC​។​

​តាម​សេចក្តីប្រកាស​ព័ត៌មាន​របស់​ក្រុមហ៊ុន​CAIC បាន​សរសេរ​នៅ​ថ្ងៃ​ទី​១០ ខែមករា ឆ្នាំ​២០២២​នេះ​ថា ការទិញ​លក់​មូល​ប​ត្រ​បំណុល​ក្នុង​ទំហំ​ទឹកប្រាក់​៣០​លាន​ដុល្លា​អា​មេ​រិច គឺ​ក្រុមហ៊ុន​CAIC​បាន​ព្រមព្រៀង​ផ្តល់​អត្រា​ការប្រាក់​(Coupon rate) ៥.៥% ក្នុង​មួយ​ឆ្នាំ ជាមួយនឹង​រយៈពេល (tenor) 3​ឆ្នាំ ហើយ​ត្រូវបាន​ធានា​ដោយ​ក្រុមហ៊ុន OCIC។

​នៅក្នុង​សេចក្តីប្រកាស​ព័ត៌មាន បាន​បញ្ជាក់​ថា ទឹកប្រាក់​វិនិយោគ​ដែល​ទទួល​បាន​ពី​សញ្ញា​បណ្ណ​នេះ នឹងត្រូវ​ប្រើប្រាស់​សម្រាប់​ការសាងសង់ និង​ការអភិវឌ្ឍន៍ គម្រោង​សាងសង់​អាកាសយានដ្ឋាន​អន្តរជាតិ​តេ​ជោ នៅ​ខេត្តកណ្តាល ខណៈ​គម្រោង​អាកាសយានដ្ឋាន​អន្តរជាតិ​តេ​ជោ​នេះ បច្ចុប្បន្ន​សាង់សង់​សម្រេចបាន ៣០% ដោយ​បាន​ចំណាយ​អស់​ទឹកប្រាក់​សរុប ៣៩០ លាន​ដុល្លារ​អា​មេ​រិក ដោយ​មិន​រាប់បញ្ចូល​ថ្លៃ​ដី​ដែល​វិនិយោគ​រួច​ដោយ CAIC​។

​សូម​បញ្ជាក់ថា ក្រុមហ៊ុន OCIC គឺជា​ក្រុមហ៊ុន​វិនិយោគ​ក្នុងស្រុក​មួយ​ធំជាង​គេ​ក្នុងប្រទេស​កម្ពុជា ដែល​ជំនាញ​នៅ​ក្នុង​ការអភិវឌ្ឍន៍​លើ​វិស័យ​ហេដ្ឋារចនាសម្ព័ន្ធ អចលនទ្រព្យ សំណង់ ការគ្រប់គ្រង​អចលនទ្រព្យ ការអប់រំ វេជ្ជសាស្ត្រ ផ្សារ​ទំនើប សណ្ឋាគារ រោង​ម៉ាស៊ីនកិនស្រូវ និង​សង្វាក់​ផលិតកម្ម​ជាដើម ជាមួយនឹង​គម្រោង​សំខាន់ៗ​ជាច្រើន​ដូចជា អាកាស​យាន្ត​ដ្ឋា​ន​អន្តរជាតិ​តេ​ជោ ខេត្តកណ្តាល , ទីក្រុង​កោះ​ពេជ្រ , កោះនរា, ទីក្រុង​រណប​ជ្រោយចង្វារ និងទីក្រុង​ទំនើប Olympia ជាដើម​។​

​ដោយឡែក CAIC គឺជា​ក្រុមហ៊ុន​បណ្តាក់ទុន​រួមគ្នា​រវាង​រាជរដ្ឋាភិបាល​កម្ពុជា (RGC) ដែល​តំណាង​ដោយ​រដ្ឋលេខាធិការដ្ឋាន​អាកាសចរ​ស៊ីវិល និង ក្រុមហ៊ុន​OCIC ។ រាជរដ្ឋាភិបាល​កម្ពុជា​បានផ្តល់​សិទ្ធិ​ឱ្យ ក្រុមហ៊ុន​CAIC ក្នុងការ​កាន់កាប់ រចនា ប្លង់ សាងសង់ ធ្វើ​ហិរញ្ញប្បទាន និង​គ្រប់គ្រង​ប្រតិបត្តិការ​គម្រោង អាកាសយានដ្ឋាន​អន្តរជាតិ​តេ​ជោ​។​

​ចំពោះ​ធនាគារអេស៊ីលីដា ភីអិលស៊ី ជា​ក្រុមហ៊ុន​មហាជន​ទទួលខុស​ត្រូវ​មាន​កម្រិត និង​ជា​ធនាគារពាណិជ្ជ​ទី​១ ដែល​បាន​ចុះបញ្ជី​លក់​មូល​ប​ត្រ​ក្នុង​ក្រុមហ៊ុន​ផ្សារ​មូល​ប​ត្រ​កម្ពុជា ។ ធនាគារ អេស៊ីលីដា ភីអិលស៊ី មាន​ក្រុមហ៊ុន​បុត្រ សម្ព័ន្ធ​ចំនួន ០៤ រួមមាន ធនាគារ អេស៊ីលីដា ឡាវ អេស៊ីលីដា ស៊ី​ឃ្យួ​រឹ​ធី ភីអិលស៊ី វិទ្យាស្ថាន ពាណិជ្ជ​សាស្ត្រ អេស៊ីលីដា និង​អេស៊ីលីដា មីក្រូហិរញ្ញវត្ថុ មី​យ៉ាន់​ម៉ា ព្រមទាំង​មាន​ការិយាល័យ​តំណាង​ចំនួន​១​នៅ​ប្រទេស​មី​យ៉ាន់​ម៉ា​។ ធនាគារ អេស៊ីលីដា បាន​ពង្រីក​បណ្ដាញ​ប្រតិបត្តិការ​ចំនួន ២៦២​សាខា​នៅ​ទូទាំងប្រទេស និង​បាន​ពង្រីក​តំបន់​ប្រតិបត្តិការ​ទៅកាន់​ប្រទេស​ឡាវ មាន ៣៨​សាខា និង​មី​យ៉ាន់​ម៉ា​មាន ១៧​សាខា​៕