អនុរដ្ឋមន្ត្រីការបរទេស និងជាសមាជិកគណៈប្រតិភូរុស្ស៊ី លោក Mikhail Galuzin បាននិយាយថា ប្រទេសរុស្ស៊ី បានប្រគល់បញ្ជីឈ្មោះកុមាររុស្ស៊ីចំនួន ២០នាក់ ដែលនៅសេសសល់ ក្នុងប្រទេសអ៊ុយក្រែន ឬត្រូវបានគេនាំទៅកាន់ប្រទេសសហភាពអឺរ៉ុប ដោយស្នើសុំឲ្យពួកគេត្រូវបញ្ជូនត្រឡប់ទៅប្រទេសកំណើតរបស់ពួកគេវិញ ។

លោកបាននិយាយបន្ទាប់ពីកិច្ចពិភាក្សានៅក្នុងទីក្រុងអ៊ីស្តង់ប៊ុលនៃប្រទេសទួរគី កាលពីថ្ងៃពុធ ទី ២៣ ខែកក្កដាថា៖« យើងបានពិភាក្សាជាមួយភាគីអ៊ុយក្រែនអំពីការប្រគល់កុមាររុស្ស៊ី ដែលនៅសេសសល់នៅលើទឹកដីអ៊ុយក្រែន ឬត្រូវបាននាំយកពីទឹកដីអ៊ុយក្រែន ទៅកាន់ប្រទេសនៃសហភាពអឺរ៉ុប»។

«យើងមិនត្រឹមតែលើកឡើងពីបញ្ហានេះប៉ុណ្ណោះទេ ប៉ុន្តែបានប្រគល់ទៅឲ្យភាគីអ៊ុយក្រែននូវបញ្ជីឈ្មោះកុមារនៅអ៊ុយក្រែន និងក្នុងបណ្តាប្រទេសនៃសហភាពអឺរ៉ុបប្រហែល ២០នាក់។ បញ្ជីឈ្មោះកុមារ និងតំណាងស្របច្បាប់របស់ពួកគេ ដែលអាចទាក់ទងបាន ដើម្បីធានាការប្រគល់កុមារទាំងនេះ ទៅឲ្យ ប្រទេសរុស្ស៊ីវិញ»។

លោក Galuzin បន្ថែមថា អាជ្ញាធររុស្ស៊ីយកចិត្តទុកដាក់ថែទាំកុមារដោយមិនគិតពីការនឿយហត់ និងឥតឈប់ឈរ។ អ្នកការទូតជាន់ខ្ពស់រូបនេះ បានសង្កត់ធ្ងន់ថា នេះគឺជាមូលហេតុដែលរុស្ស៊ីកំពុងធ្វើការយ៉ាងហ្មត់ចត់ និងប្រុងប្រយ័ត្នចំពោះសំណើរបស់ទីក្រុងគីវសុំកុមារអ៊ុយក្រែនត្រឡប់មកវិញ។