សារព័ត៌មាន CNA របស់សិង្ហបុរី បានធ្វើកិច្ចសម្ភាសន៍ជាច្រើនជាមួយពលរដ្ឋអាស៊ី ជាពិសេសនៅឥណ្ឌា ជុំវិញគោលនយោបាយអន្តោប្រវេសន៍ដ៏តឹងរ៉ឹងរបស់សហរដ្ឋអាមេរិកនាពេលបច្ចុប្បន្ន ហើយអ្នកត្រូវសម្ភាសន៍ទាំងនោះភាគច្រើនបានយល់ស្របថា បច្ចុប្បន្ននេះពុំមែនជាពេលវេលាល្អសម្រាប់ការទៅធ្វើការ ឬសិក្សានៅក្នុងទឹកដីអាមេរិកនោះទេ។

សម្រាប់ជនជាតិឥណ្ឌាភាគច្រើន អាមេរិកគឺលើសពីកន្លែងសិក្សា ពោលគឺជាផ្លូវចាប់ផ្តើមសម្រាប់ជីវិតការងារ។ ប៉ុន្តែទស្សនៈនេះហាក់ប្រែប្រួល ដោយនារីជនជាតិឥណ្ឌាម្នាក់ឈ្មោះ Neeraja Kulkarni បានប្រាប់ CNA ថា នាងជឿជាក់ថា "ការផ្លាស់ប្តូររដ្ឋបាលថ្មី" ជាពិសេសលើគោលនយោបាយអន្តោប្រវេសន៍ នាំឱ្យមាន "ការផ្អាកសម្រេចចិត្ត" ពីនិយោជកជុំវិញការជួលនិស្សិតបញ្ចប់ការសិក្សាអន្តរជាតិធ្វើការ។

យោងតាម CNA បានឱ្យដឹងថា នៅទូទាំងពិភពលោក អាមេរិកមានជនអន្តោប្រវេសន៍ច្រើនជាងប្រទេសដទៃ ដោយអាស៊ីគឺជាប្រភពនៃនិស្សិតអន្តរជាតិដ៏ធំបំផុតរបស់ខ្លួន ដោយនិស្សិតមកពីឥណ្ឌា និងចិនឈរនៅកំពូលតារាង ហើយទ្វីបអាស៊ីក៏ជាប្រភពដ៏សំខាន់នៃកម្មករជំនាញផងដែរ។ ប៉ុន្តែសព្វថ្ងៃនេះ ជនអន្តោប្រវេសន៍ដែលចង់ទៅសហរដ្ឋអាមេរិក បានជួបឧបសគ្គកាន់តែច្រើន ចាប់តាំងពីអាណត្តិទីពីររបស់លោកប្រធានាធិបតី Donald Trump ជាមួយនឹងការចេញក្រឹត្យផ្សេងៗដើម្បីពង្រីកការនិរទេស លុបចោលការការពារផ្លូវច្បាប់ និងដាក់បម្រាមការធ្វើដំណើរឡើងវិញ។

កាលពីខែមុន បម្រាមធ្វើដំណើររបស់លោក Trump បានវាយលុកតំបន់អាស៊ីអាគ្នេយ៍ជាលើកដំបូង ដោយដាក់ពលរដ្ឋចាប់ពីឡាវ និងមីយ៉ាន់ម៉ា ក្នុងបញ្ជីរឹតបន្តឹងដោយផ្នែក និងទាំងស្រុង។ CNA សង្កត់ធ្ងន់ថា ទោះជាគោលនយោបាយទាំងនោះភាគច្រើនកំណត់គោលដៅលើជនអន្តោប្រវេសន៍គ្មានឯកសារ និងអ្នកស្វែងរកសិទ្ធិជ្រកកោនក្ដី ក៏អ្នកដែលមានឋានៈស្របច្បាប់កំពុងបារម្ភផងដែរពីជំហរគោលនយោបាយប្រឆាំងអន្តោប្រវេសន៍កាន់តែទូលំទូលាយរបស់រដ្ឋាភិបាល៕