មន្ត្រីសេវាសង្គ្រោះបន្ទាន់រុស្ស៊ី បានឲ្យដឹងថា យន្តហោះដឹកអ្នកដំណើរ Antonov An-24 ដែលមានមនុស្សប្រហែល ៥០នាក់ បានធ្លាក់នៅចុងភាគខាងកើតរបស់រុស្ស៊ី នៅថ្ងៃព្រហស្បតិ៍ (២៤ កក្កដា) ហើយព័ត៌មានបឋម បានបង្ហាញថា មនុស្សនៅលើយន្តហោះ ស្លាប់ទាំងអស់។

តួយន្តហោះដែលកំពុងមានអគ្គិភ័យឆាបឆេះ ត្រូវបានគេប្រទះឃើញដោយឧទ្ធម្ភាគចក្រ ហើយក្រុមជួយសង្គ្រោះ កំពុងប្រញាប់ប្រញាល់ទៅកាន់កន្លែងកើតហេតុនោះ។ វីដេអូដែលត្រូវបានថតចេញពីឧទ្ធម្ភាគចក្រ និងបង្ហោះនៅលើបណ្ដាញសង្គម ហាក់ដូចជាបង្ហាញថា យន្តហោះបានធ្លាក់ចូលតំបន់ព្រៃក្រាស់។

យន្តហោះនេះដែលដំណើរការដោយក្រុមហ៊ុនអាកាសចរណ៍ Angara កំពុងធ្វើដំណើរពីទីក្រុង Blagoveshchensk ទៅទីក្រុង Tynda ហើយបានបាត់ចេញពីអេក្រង់រ៉ាដា ខណៈពេលដែលជិតទៅដល់ Tynda ដែលជាទីក្រុងដាច់ស្រយាល ក្នុងតំបន់ Amur ជាប់ព្រំដែនប្រទេសចិន។

អភិបាលតំបន់ លោក Vasily Orlov បាននិយាយថា មានអ្នកដំណើរចំនួន ៤៣នាក់ ក្នុងនោះកុមារ ៥នាក់ និងបុគ្គលិក ៦នាក់ នៅលើយន្តហោះ។ តែក្រសួងសង្គ្រោះបន្ទាន់ បានដាក់ចំនួនមនុស្សនៅលើយន្តហោះទាបជាងបន្តិច គឺប្រមាណជា ៤០នាក់។

ទីភ្នាក់ងារសារព័ត៌មាន Interfax បានដកស្រង់សម្តីមន្ត្រីសេវាសង្គ្រោះបន្ទាន់ ដែលនិយាយថា កម្ទេចកម្ទីពីតួយន្តហោះ ត្រូវបានប្រទះឃើញ នៅលើភ្នំប្រហែល ១៥គីឡូម៉ែត្រពីទីក្រុង Tynda។

លោកស្រី Yuliya Petina មន្ត្រីសេវាសង្គ្រោះបន្ទាន់ បានសរសេរនៅលើ Telegram ថា៖ «ក្នុងអំឡុងពេលប្រតិបត្តិការស្វែងរក ឧទ្ធម្ភាគចក្រ Mi-8 បានរកឃើញតួយន្តហោះដែលកំពុងឆេះ។ ក្រុមអ្នកជួយសង្គ្រោះបន្តធ្វើដំណើរទៅកាន់កន្លែងកើតហេតុនោះ»៕