អង្គការលើកលែងទោសអន្តរជាតិ (Amnesty International) នៅថ្ងៃព្រហស្បតិ៍ (ទី២៤ ខែកក្កដា) នេះ បានឲ្យដឹងថា អ៊ីរ៉ង់បានបាញ់ទៅកាន់អ៊ីស្រាអែលនូវគ្រាប់បែកចង្កោមដែលត្រូវបានហាមឃាត់យ៉ាងទូលំទូលាយ ក្នុងអំឡុងពេលមានសង្រ្គាម រវាងប្រទេសទាំង២ កាលពីខែមិថុនា ជាការវាយប្រហារដែលបង្កគ្រោះថ្នាក់ដល់ជនស៊ីវិល។

ដោយលើកឡើងពីការស្រាវជ្រាវថ្មី ក្រុមសិទ្ធិមនុស្សបានប្រាប់ថា៖ «កាលពីខែមុន កងកម្លាំងអ៊ីរ៉ង់បានបាញ់មីស៊ីលបាលីស្ទិកដែលក្បាលគ្រាប់របស់វាមានបង្កប់គ្រប់បែកដ៏តូច តម្រង់ទៅលើតំបន់លំនៅឋានដែលមានប្រជាជនរបស់ប្រទេសអ៊ីស្រាអែល»។

ដោយយោងតាមរបាយការណ៍នានារបស់ប្រព័ន្ធផ្សព្វផ្សាយ អង្គការនេះបានបញ្ជាក់ថា ខ្លួនបានវិភាគរូបថត និងវីដេអូដែលបង្ហាញពីគ្រាប់បែកចង្កោម បានវាយប្រហារក្នុងតំបន់ទីប្រជុំជន Gush Dan ជុំវិញទីក្រុង Tel Aviv កាលពីថ្ងៃទី១៩ ខែមិថុនា។

Amnesty បានឲ្យដឹងទៀតថា បន្ថែមពីលើនោះ ទីក្រុងភាគ Beersheba ខាងត្បូង កាលពីថ្ងៃទី២០ ខែមិថុនា និងទីក្រុង Rishon LeZion ភាគខាងត្បូងនៃទីក្រុង Tel Aviv កាលពីថ្ងៃទី២២ ខែមិថុនា ក៏ត្រូវបាន «វាយប្រហារដោយអាវុធផងដែរ ដោយបានបន្សល់ទុកនូវរណ្ដៅជាច្រើន ស្រដៀងនឹងគ្រាប់បែកដ៏តូច ដែលត្រូវបានឃើញនៅក្នុងទីក្រុង Gush Dan»។

គួរបញ្ជាក់ថា ទាំងអ៊ីរ៉ង់ និងអ៊ីស្រាអែល មិនស្ថិតក្នុងចំណោមប្រទេសជាងមួយរយ ដែលជាភាគីនៃអនុសញ្ញាឆ្នាំ២០០៨ ស្តីពីគ្រាប់បែកចង្កោម ជាកិច្ចព្រមព្រៀងដែលហាមឃាត់ការប្រើប្រាស់ ការផ្ទេរ ការផលិត និងការរក្សាទុកគ្រាប់បែកចង្កោម។

អ៊ីស្រាអែល និងអ៊ីរ៉ង់ បានប្រយុទ្ធគ្នាក្នុងសង្គ្រាមរយៈពេល ១២ថ្ងៃ ដែលបង្កឡើងដោយយុទ្ធនាការទម្លាក់គ្រាប់បែករបស់អ៊ីស្រាអែល កាលពីថ្ងៃទី ១៣ ខែមិថុនា៕