អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បាននិយាយថា ទីក្រុងតេអេរ៉ង់ បន្តវាយតម្លៃផលប៉ះពាល់ពីការវាយប្រហាររបស់អ៊ីស្រាអែល និងសហរដ្ឋអាមេរិកនា ពេលថ្មីៗនេះ ទៅលើទីតាំងនុយក្លេអ៊ែររបស់ខ្លួន ។

អ្នកការទូតជាន់ខ្ពស់រូបនេះ បានប្រាប់អ្នកយកព័ត៌មាននៅឯសន្និសីទមួយនៅទីក្រុងញូវយ៉ក ជាទីដែលលោកកំពុងចូលរួមក្នុងព្រឹត្តិការណ៍របស់អង្គការសហប្រជាជាតិថា៖«អង្គការថាមពលបរមាណូរបស់យើងកំពុងវាយតម្លៃការខូចខាតដល់ទីតាំងនុយក្លេអ៊ែរ ហើយយើងកំពុងរង់ចាំទទួលរបាយការណ៍នៃការវាយតម្លៃនេះ។

លោក Gharibabadi បានបន្ថែមថា៖«អ្នកដឹងហើយថា នេះគឺជាការងារដ៏គ្រោះថ្នាក់ណាស់។ យើងមិនដឹងថា មានអ្វីកើតឡើងនៅទីនោះទេ ដោយសារតែហានិភ័យនៃវិទ្យុសកម្ម។ ប៉ុន្តែពួកគេកំពុងធ្វើការលើ       វា ហើយមិនយូរមិនឆាប់ នឹងមានរបាយការណ៍របស់អង្គការថាមពលបរមាណូអំពីករណីនេះ»។ 

កាលពីយប់ថ្ងៃទី ១៣ ខែមិថុនា អ៊ីស្រាអែលបានបើកប្រតិបត្តិការយោធាប្រឆាំងនឹងអ៊ីរ៉ង់។ រយៈពេលតិចជាង ២៤ ម៉ោងក្រោយមក ទីក្រុងតេអេរ៉ង់ បានវាយប្រហារសងសឹក។ រយៈពេល ៩ថ្ងៃក្រោយមក នៅព្រឹកព្រលឹមថ្ងៃទី ២២ ខែមិថុនា យន្តហោះចម្បាំងអាមេរិក បានកំណត់គោលដៅលើទីតាំងនុយក្លេអ៊ែរអ៊ីរ៉ង់ចំនួន ៣ ដោយបានចូលរួមក្នុងជម្លោះនេះប្រកបដោយប្រសិទ្ធភាព។ នៅល្ងាចថ្ងៃទី ២៣ ខែមិថុនា ទីក្រុងតេអេរ៉ង់ បានធ្វើការវាយប្រហារដោយកាំជ្រួចទៅលើមូលដ្ឋាន Al Udeid ដែលជាមូលដ្ឋានយោធាដ៏ធំបំផុតរបស់សហរដ្ឋអាមេរិក នៅក្នុងតំបន់ ដែលមានទីតាំងនៅប្រទេសកាតា។ បើតាមមន្ត្រីអាមេរិក មិនមានអ្នកស្លាប់ ឬខូចខាតអ្វីគួរឲ្យកត់សម្គាល់ទេ។ ក្រោយមក ប្រធានាធិបតីអាមេរិក លោក ដូណាល់ ត្រាំ បានប្រកាសថា អ៊ីស្រាអែល និងអ៊ីរ៉ង់ បានយល់ព្រមលើបទឈប់បាញ់ទាំងស្រុង។ បទឈប់បាញ់នោះ បានចូលជាធរមាន នៅថ្ងៃទី ២៤ ខែមិថុនា។