ក្រុមប្រទេសអារ៉ាប់ និងអន្តរជាតិ បានចេញសេចក្តីថ្លែងការណ៍រួមមួយ នៅថ្ងៃព្រហស្បតិ៍ (ទី២៤ ខែកក្កដា) នេះ ថ្កោលទោសការអនុម័តពីសភា Knesset របស់អ៊ីស្រាអែល លើសេចក្តីប្រកាសដែលអំពាវនាវឲ្យមានការដាក់អ្វីដែលគេហៅថា «អធិបតេយ្យភាពរបស់អ៊ីស្រាអែល» លើតំបន់កាន់កាប់ West Bank។

សេចក្តីថ្លែងការណ៍នេះ ត្រូវបានចេញដោយប្រទេសអារ៉ាប៊ីសាអ៊ូឌីត បារ៉ែន អេហ្ស៊ីប ឥណ្ឌូនេស៊ី ហ្ស៊កដានី នីហ្សេរីយ៉ា ប៉ាឡេស្ទីន កាតា ទួរគី អារ៉ាប់រួម សម្ព័ន្ធរដ្ឋអារ៉ាប់ និងអង្គការសហប្រតិបត្តិការឥស្លាម។

សេចក្តីថ្លែងការណ៍ដែលត្រូវបានចែករំលែកដោយក្រសួងការបរទេសអារ៉ាប៊ីសាអ៊ូឌីត បានរៀបរាប់ថា ភាគីទាំងអស់ ចាត់ទុកចំណាត់ការនេះថា ជា «ការរំលោភច្បាប់អន្តរជាតិយ៉ាងច្បាស់ក្រឡែត និងមិនអាចទទួលយកបាន និងជាការរំលោភលើសេចក្តីសម្រេចដែលពាក់ព័ន្ធរបស់ក្រុមប្រឹក្សាសន្តិសុខអង្គការសហប្រជាជាតិ»។

សេចក្ដីថ្លៃងការណ៍នោះ បានបន្ថែមថា៖ «ភាគីដែលបានរៀបរាប់ខាងលើ បញ្ជាក់ជាថ្មីថា អ៊ីស្រាអែលគ្មានសិទ្ធិអធិបតេយ្យភាពលើដែនដីកាន់កាប់ប៉ាឡេស្ទីនឡើយ ដោយសង្កត់ធ្ងន់ថា ចំណាត់ការរបស់អ៊ីស្រាអែលជាឯកតោភាគីនេះ មិនមានផលប៉ះពាល់ផ្លូវច្បាប់ និងមិនអាចផ្លាស់ប្តូរស្ថានភាពផ្លូវច្បាប់ នៅដែនដីកាន់កាប់ប៉ាឡេស្ទីនជាដាច់ខាត ជាពិសេសនោះ ក្នុងរង្វង់ទីក្រុងហ្សេរុយសាឡឹមភាគខាងកើត»។

គួរបញ្ជាក់ថា សមាជិកសភាអ៊ីស្រាអែលជាង ៧០រូប បានអនុម័តញត្តិមួយ កាលពីថ្ងៃពុធ (ទី២៣ ខែកក្កដា) ដោយជំរុញឲ្យរដ្ឋាភិបាលដាក់ចេញអធិបតេយ្យភាពលើតំបន់ West Bank តែញ្ញត្តិជានិមិត្តរូបនោះ មិនប៉ះពាល់ដល់ស្ថានភាពផ្លូវច្បាប់នៃដែនដីប៉ាឡេស្ទីនឡើយ៕