នៅថ្ងៃព្រហស្បតិ៍ (ទី២៤ ខែកក្កដា) នេះ ទីភ្នាក់ងារសារព័ត៌មានអន្តរជាតិ ដូចជា AFP, AP និង Reuters ក៏ដូចជា BBC ផងដែរ បានអំពាវនាវឲ្យអ៊ីស្រាអែលព្រមអនុញ្ញាតិឲ្យអ្នកសារព័ត៌មានមានលទ្ធភាពចេញចូលតំបន់ហ្កាហ្សា ដែលត្រូវបានរារាំងយ៉ាងតឹងរ៉ឹង។

បណ្ដាញសារព័ត៌មានទាំងនោះ បានលើកឡើងនៅក្នុងសេចក្តីថ្លែងការណ៍រួមថា៖ «យើងមានការព្រួយបារម្ភយ៉ាងខ្លាំង ចំពោះអ្នកសារព័ត៌មានរបស់យើង នៅតំបន់ហ្កាហ្សា ដែលកាន់តែមិនអាចចិញ្ចឹមខ្លួនឯង និងគ្រួសាររបស់ពួកគេបាន»។

ស្ថាប័នទាំងនោះបានបន្ថែមថា៖ «អ្នកសារព័ត៌មាន បានស៊ូទ្រាំនឹងការខ្វះខាត និងការលំបាកជាច្រើន នៅក្នុងតំបន់សង្រ្គាម។ យើងមានការព្រួយបារម្ភយ៉ាងខ្លាំងដែលការគំរាមកំហែងនៃភាពអត់ឃ្លាន ឥឡូវនេះ គឺជាផ្នែកមួយក្នុងចំណោមការលំបាកទាំងនោះ»។

បណ្ដាញសារព័ត៌មានទាំងនោះ បានសរុបថា៖ «ជាថ្មីម្ដងទៀត យើងជំរុញដល់អាជ្ញាធរអ៊ីស្រាអែលឲ្យព្រមអនុញ្ញាតឲ្យអ្នកសារព័ត៌មានចេញចូលតំបន់ហ្កាហ្សា។ វាគឺជារឿងចាំបាច់ណាស់ដែលការផ្គត់ផ្គង់អាហារគ្រប់គ្រាន់ត្រូវបានទៅដល់ប្រជាជននៅទីនោះ»។

គួរបញ្ជាក់ថា ដោយតំបន់ហ្កាហ្សាត្រូវបានបិទខ្ទប់ ក្រុមអង្គភាពសារព័ត៌មានជាច្រើន នៅជុំវិញពិភពលោក ពឹងផ្អែកលើរូបថត វីដេអូ និងអត្ថបទពាក់ព័ន្ធនឹងជម្លោះ របស់អ្នកសារព័ត៌មានប៉ាឡេស្ទីនដែលធ្វើការឲ្យទីភ្នាក់ងារព័ត៌មានអន្តរជាតិ ដូចជា AFP ជាដើម។

អង្គការឃ្លាំមើលបណ្ដាញសារព័ត៌មាន គឺសារព័ត៌មានគ្មានព្រំដែន (RSF) បានឲ្យដឹងនៅដើមខែកក្កដានេះថា អ្នកសារព័ត៌មានជាង ២០០នាក់ហើយ ត្រូវបានសម្លាប់នៅតំបន់ហ្កាហ្សា ចាប់តាំងពីសង្គ្រាមបានចាប់ផ្តើមផ្ទុះឡើង៕